auhmun

Literally speaking

2012-01-19T23:56:00.001+05:30

"Thlan kan lai"kan tih hian mi threnkhat chuan dik inti deuhvin "Thlan tur kan lai" an ti a. A nihna takah chuan 'Lei kan lai' a ni zawk reng sia

Thlawhtheihlohna hmangin Gauhati Lamtluang

2012-01-06T16:07:00.002+05:30

Thlawhtheihna service mumal tâk hnu hian Guwahati – Aizawl bus leh sumo service hi a lar ta vaklo emaw’n chu aw? ka ti ṭhin a. Mahse a lo ni lo. Zantin mai hian Kolasib-a night bus zan tlan ho chaw ei hmuh tur an la awm tlat. Heng night bus leh sumo passenger te ngaihtuahna hi a lo inanglo thei hle dawn hian ka hre ṭhin.

Nunphung inanglo leh zinchhan inanglo tak tak an ni hlawm bawk a, lirthei an chuan chhunga an rilrua thil awmte pawh hi a inanglo hlawm hle mai. Hei-
1. YMA seat-a ka ṭhut peihloh vangin Seat no 6 ka la ve a, counter hovin Sumo remchang changa seat awmchhun chhunah min dah leh a. Aizawl kan thlen hun chuan chanchinbu leh TV-ah SMS ka thawn loh atâkah!
2. Khanapara-a kan din chuan um khat lek ka lei phei ang.
3. Ka bula ṭhu hian min ‘risk’ a tum chiang mai.
4. Ka bula ṭhu hi nuthlawi sumdawng vak vel a ni chiang mai. Khua han thim deuh se ka ‘risk’ khawp ang.
5. Hic! Hic! Night Bus-ah a tam ṭhin an ti sia, khawnge khum fâ chu? Hic! Hic!
6. Tengtere den ka ei chak
7. Jaintia Hills hi chu a va han mawi tak.
8. Kalain phei kawng chhe reng mai hi chu ka va han kham tak*
9. Kan driver hi a chauh deuh chuan “Ka lo khalh chhawk dawn che’mi?” ka ti ang
10. He Ladrymbai hotel liana “Chaw ei man (coupon) lei rawh” tih an ziak hi an Mizo Ṭawng a diklo. A thiam deuhte pawh râwn ve mai awm. Tunge thil ‘man’ lei ngai?
11. Beer ka in khanglang atin ni… Ka zun a chhuak sek mai
12. Vairengte Excise gate-ah U Lalnuna lo duty hlauh sela aw!
13. Vairengte Excise gate-ah min lo check uluk viau angem aw?
14. Vairengte Excise gate thlen veleh ka inthiar ang
15. Seipuii Hotel, Vairengte-ah ka inthiar ang*
16. Seipuii Hotel bul dawrah khan Khaini an nei al angem aw?
17. Kan khaw Sumo dar 3 chhuak kan nan hman mai dawn hi a
18. Lum si; khu si*
19. A lo beisei ve leh dawn tho si a, ka Putea chu MC Rum um khat hawnsak mai ang.
20. Way Bill ka nei mumal si lova, Bairabi lama kual rawt ila a ṭha ang. Ka lo hire law law mai lo a ni.
21. Silchar hi ka hre bel thei thlawt lo*
22. Min lo suam ta se, lo beilet ta ila, ka bula sipai chhuti hian min pui êm ang chu maw.
23. Min lo suam ta se, a hminga sipai chhuti awmchhun nih chuan beihlet ve ngei a ngai dawn a nih hi
24. Min lo suam mai angah…*

*Hetah hi chuan passenger an inthurual vei deuh ṭhup

Keima Photography

2011-11-17T10:24:00.003+05:30

Nupui/Pasal neih nikhuaa thlalatu thiam tak kan ruai dawn a nih chuan hengte hi hriat a ṭha:
1. Thlala thiam tak tak chuan DSLR Camera pahnih tal a rawn ak ngei ngei ang.
2. A camera-ah chuan flash a rawn vuah luau anga, a hmang lem hlei lo ang a.
3. A flash ên chhuahna laiah chuan lehkha dangdai tak engemaw a thiat tel mial maithei
4. Suit a rawn ha ang a, en thuak chuan a hmeichhe lam chhungte a nih hmêl mah zawk ang.
5. A 50mm (1.2mm) lens man kha zawt duh suh. I zawh buai ngai lovin i hriat phak ngei tur siin photographer dang emaw, DSLR camera lo lek ve dangte a hrilh tho tho ang. Lens sei pui satliah aia a to fe zawk thu pawh a sawi tel mahna.
6. Mihringbaknei emaw tih mai turin a khabe a zuah hmul kher lo thei a, a sam a sei kher lo thei bawk. He’ng em em hi chu mimal duhthlanna a ni. Mihring kan inang lo.
7. Hmeichhia leh mipa naupang suit ha in lo ngaihtuah lawk theih chuan a ṭha khawp ang. Inneih thlalak ti dangdai tu atan an duh ṭhin ania. Mipuiin pulpit lam an hawi ṭhup laiin naupang chuan hnunglam rawn hawi se, thlalatu chuan an thla a lo la dawn alawm.
8. Monu ṭhian/laichin hmeichhe ho zingah kawr rang inang ha deuh ṭhup an awm theih chuan thlalak a ti hmuhnawm duh an ti’a nia.
9. Thla la tur ngau ngauvin mo thuam famkim nen Rih Dil in kal lawk hman angem? A theih ngang loh paw’n Sihhmui tal.
10. Mipui ṭin darh hnuah Biak In chhungah nangmahni inhlat deuh deuhte, Biak In kil thim deuh riai te, tukverh bul eng deuh riai laiah te thla in lak a ngai dawn ania. A innei-a te fiah deuh, in ṭhiante phe deuh riai te paw’n in la mahna.
11. Mo theh – (Tunlaiah chuan mo spray – Let us spray) : Mo theh lai khan lai hauh suh ang che u – Digital SLR camera ṭuan rang deuhvin an lo hmet zawt zawt dawn si a – Second khat chhung lek paw’n vawi 5 te an hmet hman – click click click click click – kha!
12. Digital Album-ah in inneih thlalak chu an rawn pe thlap ang che u. A va changkang tak em. I hriatthiam dan tur chuan Digital Album chu Lunglen Magazine ang chiah chiah hi a ni deuh mai. Fakna erawh a awmlo thung ang a. “He thlalak-ah hian ka lang ve e, ka la dawn” tia duh duh lak ngawt theih a ni lo – khual aṭanga rawn kal mipa lam chhungte pawh nise. Fakna a awm lo kan ti tak na a, in album phek kil tinah khan milem tereuhte i hmu ang a, chik deuh taka i en chuan cartoon deuh roh thla la lai lem a awm maithei. A hnuaiah tereuhte, fiah zet siin ‘Photografix Photografi’ tih a inziak maithei. Kha kha in inneih thlalatu advertisement a nih ve kha. A hnawk lem loh kha maw.

Nang i hmunah – kei Formula One intlansiakna hmunah

2011-11-01T22:48:00.002+05:30

Khawvelin a ngaihsan Formula One car intlansiak India ramin a thleng ve dawn tih thawm a rawn rik rual rual khan phur namenin kan phur ta lo a nih hlawm kha. October ni 29 a rawn inherchhuah meuh chuan ka ṭhian leh hmelhriat engemawzat te mobile chu a roaming ta sup sup mai. Han phone ila, Delhi tlangah an lo fu vung hlawm nia.

Chutiang inelna ropui a hmuna en thei nih chu, zep lo ta law law ila, ka chak ve tehmeuh mai. Amaherawhchu thlakhlelh hleihtheiha ngai lo tura kawng hrang hranga thunun ka ni. Chuvangin, chauh thu ba rawh khu sut sut mai ang. Grep te chu a thûr thûr nen.

Systematic procedural analysis leh methodological research engmah ka hmang hauh lova, a hmuna Indian Grand Prix zuk entu, ka ṭhiante khan, ka rindanin - (‘x’ lam ri chuang lo tur tho tho hi chuan a hawrawpah hian PRIX ti kual vel lo hian PRI tih ve hle hle mai awm)

1. Thlawhtheihna ticket an buaipui phawt anga, chutah a enna tur ticket
2. Chhungte leh belh tur hre ṭha deuh chuan Mizoram House an pan thên thei a, a nei ve hrim hrim te erawh chuan Hotel changkang. Paharganj-a sap vakvai ho thlenkhawmna hotel man tlawmte pawh an pan mial thei bawk. Zirlai leh hnathawka awmte thlenchilh pawh a remchang tho mai.
3. Zu changkang – Bagpiper, Old Monk leh Officer’s Choice te pawh in an awm ang.
4. Tichuan Delhi khaw kianga Noida-ah chuan car intlansiak en tur chuan an va kal ta a.
5. Rei ngial an intlar hnuah ṭhuthmun an rem thei ta hram a, vai milian fapa hovin hmarchhak mite chu an en deuh hrek hrek lehnghal emawni?
6. Tichuan intithei takin Formula One intlansiak tura an insingsa lai vel chu mêl chanve vela hla an ṭhuthmun aṭang chuan an ral thlir ta a.
7. Uluk takin an han thlir ṭhin a, tu ber khu nge Michael Schumacher chu ni a, tu ber khu nge an head mechanic tih pawh an thliar leh hleithei silo – zaipawl ang maiin kawr inang vek an ha a!
8. Intlansiak tur chuan an rawn tlanchhuak ta tliar tliar e. A hma ai chuan thliar an awl ta deuh – kawr inang pahnih zel chauh an awm ta (Zaipawl aiah duet !)
9. TV-a en ang ngawt a lo ni leh si lo. Team thuhmun ami rau rau kha tu zawk nge Lewis Hamilton nia tu zawk nge Jenson Button tih pawh thliar a har leh si.
10. An tlan ṭan ta – phûrawm fia fia !
11. Ving… ving… ving… (Car 24 vel emawni) … second 10 velah an liam duak… Big Screen-ah khawvel hmun tina TV-a thlirtu ten mahni in luma ṭhutthleng seia mu khamphei zuar chunga an lo thlir ve tho ang kha lo thlir a ni ta mai.
12. Chutah minute 3 vel hnuah… ving… ving… ving… (Car 24 aiin a tlem tawh maithei – accident an lo awm keuh chuan).
13. Same as 11 – 12 (Car tlan zat erawh a danglam maithei e)
14. Darkar khat emaw a liam a, draught board/chess khelhna niawm taka ṭial flag an vai ta. Kan ṭhian ṭhenkhat phei chu an ṭhutna a hla deuh a ni mahna, heta an flag vai hi kuhva zuartunu puan lukhum phe emaw an ti.
15. A chakber te hnam hla an play a, a chakbera te lah chuan mahni hnam hla ngaithla e ti lovin an play lai lai te chuan hnuailama awm an thawhpuite chu an zuk bye bye vel ta dah a.
16. Champagne an thing phuan buah buah a, an inleih tawn a, a tawp ta.
17. A hmuna en ve ka ṭhiana kha a ṭhutna a fuh awm lo ngawt mai ka ti. Khatia intlansiak an zawh fel chiah khan SMS hmangin intlansiak result min rawn zâwt!
18. Kei lahin car intlansiak ka lo en ngai i-khaw silova,ṭhian ten min mamawh laia pui theihloh kha hrehawm ka ti teh e. Doordarshan chiah ka pawt bawk atin ni.
19. A zo fel.
20. Ting Tong… kripya dhyan dhijiye… New Delhi – Guwahati Avadh Assam Express Platform number char main aa rahi hai… Ting Tong… tiin thupuan an ngaichang thei.
21. E, a ni leh lo. Rêl chuan an rawn haw leh lo. Via Lengpui leh si.

Celebrity nih dan

2011-09-27T23:50:00.002+05:30

Celeb nih dan awlsam:
1. Bazarah i kal ang.
2. Camera hawh tur i zawng ang.
3. I sum dinhmun azirin bus/taxi/paidalin i haw ang
4. Hla i phuah ang
5. Soundtrack i siam tir ang
6. Studio ah aw i thun ang
7. In veng nula tuemaw TV a lan chák deuh i sáwm ang. Inthlákna tur rawn keng nghal se. (Set 4 tal)
8. Hmelhriat taxi i ko ang
9. Tripod hawh tur zawng pah la
10. Cameraman atan taxi driver chu i hmang nghal ang. (On, off leh zoom dan hrilh la a táwk mai)
11. Taxi-a a China siam music system, Pendrive pahnih support ah khan i zai chu i play anga, chumi rual chuan camera chu 'on' tur
12. A ri mil chuan phun rem la
13. I zai pah chuan i nula hruai, model nen chuan 'ni' ang deuhvin awm ru le
CUT
14. Model dress change
15. Continue.
16. A tawk e. In haw thei.
17. Windows movie maker ah edit. 25 minutes
18. Demand channel-a dah turin pe rawh le
19. Mahni inthlan lár chiah a ni tawh mai.
VOILA.... WE HAVE... A NEW CELEB

JL Cinema - I liam mai tur hi

2011-09-23T21:27:00.003+05:30

JL Cinema Hall – I liam mai tur hi-Stephen Auhmun

“JL Cinema Hall chimin kawng a hnawh” tih message ka dawng a, mak ka ti hle. Chutah khawvela TV channel awmchhun emaw kan tih \hin Doordarshan zan Chanchin Thar-ah (A chhiartu Priscilla L Hnamte) ka en a, a chim phei zawng a lo chim vek lo deuhva, chim tluk a ni e. JL Cinema Hall chu loh theih lohva \hiah a ngai dawn ta niin a lang a, an han \hiat mah na’ng a, lungleng ve fe fe chu an tam ngawt ang mawle.

“Tunhma deuh kha chuan Aizawl \halaiten cinema en an uar \hin lutuk” ti ta ila keini aia la nau ve leh chhawng tam tak hi chuan an awih kher lovang. Krishna Talkies kha chu hmuin hre ve hmanlo mah ila kei leh ka rualpui, UT hun laia piang ho kha chuan JL Cinema te, Zodin te, AR te kha kan hre bel ve hle a, Aizawl Hmar lam phei chuan Pushpak Theatre pawh an hria. Lunglei lamah pawh RTP Cinema a awm \hin an ti. Sipai camp-ah chuan Cinema Hall a awm deuh zel a ni awm e.

1990 chhova Cable TV rawn chhuah hma khan TV kha a hlu lo angreng hle. ‘India’ kha a ni deuh mai a, khatih lai khan Doordarshan a nih tawh leh tawh lo ka ‘hriet nawh’. Aizawl tlaklam panga awm ten ‘Bangla’ an man belh a ni deuh mai. Dan naranin India ai khan Bangla a hmuhnawm zawk.

India-ah chuan ‘chitrahaar’ khan chan leh en a hlawh deuhva, Pathianni chawhnu-ah ‘Tuichhung lut’ kan en \hin bawk. Bangla-ah ve thung kha chuan ‘Ebong, chhaichhubi – Macgyver’ te, The Fall Guy te kan en \hin. Bangla TV hi a ni, Mizoten Soap Opera kan hmelhriat \anna nia lang ta chu - Against the Wind te, Oshin te kha Japanese serial an ni tain ka hria.Chhungkaw tlemtein ‘Video’ an nei bawk tak e. Khatia ‘Video’ tia kan sawi \hina kha tunhnu, ka lo changkan tak hnu leh lehkhathiam ka lo nih tak hnu hian ‘Video Cassette Player/Recorder (VCP/VCR)’ an lo ni tih ka hrechhuak. Chutiang chu a nia, Cinema Hall kha a hluin a rak viau hlawm a ni.

Kan naupan lehzual laiin JL Cinema Hall leh Zodin kha an lar thei ngawt mai. Kan veng Tlangnuam lam hnaih zawk a ni bawk a, Zodin aiin JL ka nel zawk. |um khat chu Inrinni chawhma dar 11:00 show kha ka pa’n min enpui ve a, cowboy lampang ni tain ka hria. Ka hre tawh silova, a film hming chu phuahchawp rih lo phawt ang. Duh leh nakinah film hming chu awm ang deuh ka rawn phuahchawp zawk ange.

JL Cinema Hall-ah khan kan veng tlangval U Zohminga a thawk ve \hin a, kha vang khan kan tlangnel bik em em \hin nia. U Zohminga hi a la tlangval reng lehnghal a, hetia \hiah a nih dawn takah hian a lung a leng ve ngeiin ka ring e.

Tunlai angin inbiakpawhna lam a la chak ve lova, film thar leh film hlui kha a hlut dan adang chuang paw’n ka hre lo nia. Tunah te chuan film release thar apiang kan lo download ve zel thei a, kha’ng hunlai kha chuan film chhuak thar leh tharlo kha kan hre hrang paw’n ka hre lo. JL hovin an neih thar apiang kha film thar chu ni ta maiin ka hria. Film thar a ni vek lo a nih ka rin leh hnuhnawh takna chu The Sound of Music kha a ni. Keini pawhin JL Cinema-ah khan kan en a ni a. Hetia tlangval Google-a nena kan inhmelhriat tak hnu hian ka zawntir chhin a, 1965 kuma release a ti tlat. Ram pawh a la buai lo tihna a nia!

JL Cinema Hall chu kan hria anga, a luhka a rem lutuk lo a nih hi. Ticket la tur innek luih luih te kha ka la mitthla thei a, tlangval pakhat mi lu chunga ‘dive’ phei pawh ka hmu. Tichuan ticket kan han hum thlan dup a, kan lut thei ta. ‘Kan lut thei ta’ tih lemah luh phalna kan nei a ni chauh a, ‘luh remchanna’ kha a keng tel lo. Gate bula innek leh fe a ngai.Tichuan chhungte’n min hruai ve duh chang chuan JL Cinema Hall-ah chuan film chu kan en ve \hin a, a hmuhnawm leh nawm loh hre tur paw’n ka la nau viau mai.

Tichuan kan han leikang ve deuhva, thil kan hrethiam ve \an ta deuh tihah ‘Star TV’ a lo chhuak ta hlawl mai. A rawn chhuah hlim khan Cable TV kan la ti lova, Star Network ho channel chauh kha an pe rih bawk a, Star TV kan tih \hin kha. Tichuan TV neite chuan chu Star TV chu an pawt a, TV pawh a ti hlu narawh; a pun lah a pung chak. Cinema Hall khan Star TV rawn chhuak chu a tuar ngawtin ka hria.JL Cinema Hall, lun em em \hin kha a rak lo tial tial a, entu tur mumal awm ta lo chu vai film \enghneng te te chhuahin an kal ve hram hram ni khan a lang. Chutiang bawkin Zodin pawh. Lammual sira Assam Rifles ho Cinema erawh Karimganj Engineer ho leh ‘|hianite’ hovin an la bawr deuh lat lat reng tho.

Chutia kum 4 kum 5 vel mipuiin Cinema Hall kan hnuchhawn hnu khan eng rau nge thawka engin nge mipui rilru kuaiher ka hre law – 1995- 1996 vel a\ang khan Cinema en kan intihhmuh leh thut mai. A bikin high school leh college zirlai ten an uar zual emaw tih tur a ni.St. Paul’s Hr. Sec-a Cl XI kan zir kum a nia, ka la hre ran mai. |hian zahovin JL-ah te, Zodin-ah te Cinema kan en \hin. Kan film en ka la hriat pakhat chu Sean Connery channa ‘The Rock’ kha. Hei chu ka phuahchawp hauh lo ania. Sikul chu kan tlanbo miah lo – Sikul ka tlanbo ngailo; Sikul uniform ka hak laiin vawikhatmah ka tlanbo lo; ve tlat mai a!

Khatia Cinema kan en kha kan tui ve thei em em mai. Kan \hian \henkhat phei kha chu Cinema Hall chhung thimah khan 'an ni' \hin. An va lerh tak. Sap film lar em em mai, a changtupa chu negro pawh kan en. Independence Day kha. Kha film phei kha chu an chhuah rei fu nghe nghe. Kha film chhuah vanglai phei kha chu pui tak a ni, pui tak. Cinema Hall neitu kan \hianpa Mala te chhungkua pawh inchung bathlar a\angin an rawn dak paw pheu zel. A film ai mah khan a entu nih tumte chetla kha a hmuhnawm zawk awm asin mawle.

Tichuan zirlai ni chunga kawr inang hak \hup \hup hun kha kal pelin College kan han rap ve ta a. "Aizawlah rau rau chuan he college hi a \ha ber" tih lam ai mahin kan veng a\anga hnai ber a nih vang zawkin Aizawl College-ah ka lut a, ka thlang sual lo hle nghe nghe e. Cinema en kan hrat chhunzawm zel.Khatia college kan han kal ta kha, zalen ta riauva inhriatna chhungril nun kha midang ang bawkin kan han nei ve hlawm a, Cinema en uar vanglai nen a in nang chho nen, JL Cinema hall kha kan bel viau mai. Light an han off pawh khan seat number kha kan pan dik chat chat mai a, usher kan mamawh lo reng reng.

Uniform haklaia Cinema en paha ‘ni’ te kha chu zia tak an ni - college zirlai cinema hall chhunga \hu \hup zingah phei kha chuan 'ni' an tam \hin asin aw. Ka \hiante zinga mi Eric Zomuana leh C.Rema pawh kha an 'ni' tlatin ka hre \hin. Ka ngaih an ti \halo \hin takzet a ni.Aizawl College a\ang khan JL Cinema hall kha a hnai nasa mai si a, a chang phei kha chuan college ai mah khan JL ah zirlai kan tam zawk \hinin ka hria. A thli a tleh tak tak lai phei kha chuan zirlai rilru nei tak tak, "He pa hi chu a va han dingchhuak dawn chiang tak; a taima si; a inchei dan te hi en ila - kamis a ha a, chapal tle zet bunin a sam a khuih pial than bawk si. Pull-over a nei lehnghal, hlawhtling tur a ni" kan tih te zinga mi te pawh khan Cinema kha an en ve \hin. Ka phuahchawp miah lo.Ram pawna lehkha zir kan \hian ten nuam an tih ang thil chi hrang hrang kha nei ve lem lo mah ila, JL Cinema hall ah khan Mama, Dinga, Dawnga, Denga te nen nuam nia kan hriat kha kan chen a, Tv. Vincy-a pawh a la lar dawn tih hre lovin kan beng thle lel lel \hin a nih kha. Damlai par kan hmang chul e.

Tuna mahni en chak apiang film download a, sai pumpui tiat tiat LCD, LED leh Plasma TV lian pui puia en ang hi a ni law; JL Cinema Hall-ah kha chuan ‘interval’ te kha a hlu nek nia. Meizuk ruk kan ching titih tawh kha a ni a, interval lai khan mei kan zu a, lecturer ni ve hlei lo khan zun inah kan zuk ‘lekchar’ bawk \hin. Tlemin lo muang fal deuhvin show min lo \ansan pawh nise, kan buai lem lo. Hall chhung thim zingah pawh a hmunhma kha kan hre bel em asin.

Aizawl College kan kallai mek khan Aizawl Cinema Hall ten zuai lam an pan a, a Greek \awng takin ‘Aizawl : The re-emergence and decay of entertainment through a theatrical perspective – An eye-witness account’ tih lehkhabu pawh ziak ila, thil awmlo lutuk a ni dawn hauh lo mai. Keini rual ho kha Cinema Hall rawn in dinthar leh leh a tlusawp hmutu kan ni tlat. Kan en reng laiin JL Cinema leh Zodin Cinema ten par an chhuang a, kan hmuh lai ngeiin an tlusawp leh a nih kha. Entu nei ta lo chu kalpui reng theih ni ta hek lo; kan belh \hin JL Cinema chu thingzai zawrhna atan hman a ni ta a, Zodin pawh Second Hand wholesale-na hmun atan te, sikul atante hman a ni chho ta. Ticket black \hinte lung lung pawh a lengin ka ring e.

Tu khaw-khain kan ngaihsak lem lova, an awm ve tih pawh kan hriat tak loh hnuah Chanchin Thar dangdai takin min rawn deng dawt mai a. JL Cinema hall chim hlauhthawnawma a awm thu leh \hiah a \ul tur thu ka han hria chu ka lung a leng ve deuh veng veng mai nia. Hamlet-a \awngkam takin ‘Mi chuang ui chuang’ ang maiin MG Road-ah khawhar takin a ding khawro ram mai a, lungleng thei chu nise a lung a leng ve \hin ngawtin ka ring nia.

Engtikniah emaw chuan Aizawl khawpuiah pawh hian Cinema Hall changkang, Multiplex, PVR chuti khati a la ding mial mahna le! Amaherawhchu JL leh Zodin Cinema Hall vanglai an er pha ngut ang emaw chu!

JL Cinema Hall – thlah na’n mittui! I tan far khat; ka tan far khat le.

Facebook status update via offset press

2011-08-30T21:57:00.000+05:30

Khawvelah hian englai pawhin Facebook-ah mi maktaduai 250 an online reng ang ngaih a ni. Zocop Ralte te, Hming Sanga te, KT Pakhuangte te hi he kan chenna planet (of the apes) ah hian awm lo se chu hei ai hian mi 3-in an tlem dawn tihna!

Facebook vang hian ka ṭhian tam tak, eng hnam nge an nih ka hriat ngai lem lohte hnam ka hriat phah a, a ṭangkaina phei chu ka hre lem lo na a, hriatloh ai chuan knowledge chu a tizau ve hret chuan ka hria nia.

Computer kan han on a, kan han lut nghal chat mai a, a chunglam veilam a lo sen vei tiarh a, a nuam ve deuh veng veng theiin ka hria (Research leh survey changkang hmanga finfiah erawh a ni lo thung). Chutah ‘chat’ ah kan han lut leh a, kan han ‘green’ nileng leh ṭhak mai bawk a, min ning tan chuan kan ninawm ve thei hle dawn niawm tak a ni. Hetia nileng lenga hring ṭhin Lalrinliana Ralte te, Aldrin Lallawmzuala te hi chuan hlaah pawh “Hring la i nung ang…” an tih duh hmelin ka hria.

Mi thil post apiang lo ‘LIKE’ ka ching ṭhin a, hawihhawmna ni paw’n ka hre bawk ṭhin. ‘Marawhchu ka ngaihtuah chiang ta deuhva, Lengpui Airport-a thlawhtheihna chesual thlalak an rawn dah a, lo LIKE ngawt kha chu a felhlel chu ka ti ve deuh. A enga kha nge LIKEly ta em em chu?

Ka la hrereng mai. Ka ṭhianpa pakhatin chehpuah chesuala a nau a boral thu a rawn post a, ka’n lo LIKE pek kha. DISLIKE tur zawk ni reng siin. DISLIKE-na phei chu a awm azeng pawh a ni hlei law.

“Hei thlalak ka dah thar a, i lang ve ania. Lo en ve mah teh” tihna a ni ber ang chu – tag chu. Tu’n emaw thlalak-ah min ‘tag’ thu a rawn lang a, phur takin kan han en ta cheng a, ui niawm tak, vawkpui ang deuh ni bawk si, a note hnute pe bawk vung lai thlalak te hi a lo ni ta dah a. A khawilaiah khan nge ka hmel a lan ve ka hrethiam theilo. A nih loh leh leimin thlalak te hi a lo ni a, “He thlalakah hian i lo lang ve nawlh mai” ti niawm takin min rawn ‘tag’ ṭhin bawk sia! Mafaa te in bula Roadroller a accident ṭum pawhin a thlalak an rawn dah a, min ‘tag’! Hahaha. Lolzz! RTNzz!

Add as a friend tih te a awm bawk. Facebook ve ngailo te in bangbo lutuk loh nan – Add as a friend tih chu a Zo ṭawng chuan ṭhian anga belh tihna a ni ngawt lo a nia. Facebook-ah chuan ṭhian kan nei thliah thluah a, tuemaw ka ṭhian duh chuan heti hian ka va Add as a friend keuh mai a ni. Kan lo ngei ruk ngawih ngawih ten min rawn add as a friend chang hian lo hnar ngawt a rem chiah silova, tuma hriatpui siloh hian kan lai deuh hu thei titih.

Facebook hi ṭhian hlui zawnchhuah leh na’n chuan duhthusam tluk deuhthaw a ni. Matric kan zawh hnua vawikhatmah ka hmuh leh tak loh; an awmna chin pawh ka hriat tak lohte kha Facebook zarah ka bepawp leh thei a, a va ṭha tak. ‘Marawhchu hming lem an hman vaih erawh chuan chuti hlauh! High School-a ‘Bill Body-a’ nia kan hriata kha Facebook-ah chuan ‘Tetea Pachuau’ a lo ni daih a, vawikhat inhmuhnaah kan inhai ṭep chu a ni e. Lalremruata Sailo pawh ‘Remrudess Sailo’ a inti tlat a, min ti khawr riau.

Fiamthu nuihzatthlak tak nia kan hriat kan han post a, chutah like a hlawh em, comment a hlawh em tiin kan han vil ru leh vei zuk zuk a, a va nuam fahran. Comment a hlawh deuh phei chuan chapo a awl ve hle mai a lo ni.

Status Update te an ti. A hre ve ngailote hrilh an ngai leh ta.

A bul aṭangin sawi ṭha leh law law ang. Facebook chu Notice Board ang deuh hi a ni ber mai a, Internet notice board tihna a nih deuh ber chu. Chu Notice Board-ah chuan i duh leh thlalak i tar anga, a nih loh leh thu i ziak kawi mai mai thei. Awmze ril deuh nei, ngaihtuah chet chet ngai – “He is a pretty man” tih ang chi emaw thu lawilo leh awmze neilo – “Wywtsa oiwhen” tihte pawh i ziak thei.

Chu’ng i thuziak te chu an duh leh i ṭhianten an lo ‘Like’ anga, an duh leh an comment ang. Facebook-ah chuan mi zawng zawng hi commentator kan ni vek mai a, Pu Vana emaw, Pu Hruaitea emaw nih kher a ngailo. Kan ‘commentating’ kha duh chuan an la rawn ‘Like’ ve leh chhawng thei a, a va zia. Commentary ti lova Commentating tih ṭawngkam hi ka hmuhchhuah – a duh tan a ‘Like’ theih e.

Tichuan internet notice board-ah chuan kan vei ta nuk nuk mai a nih chu.

Facebook hian ṭhalai a hrut nasa zual niin a ngaih theih na a, Mizo zingah pawh Facebook hmang ṭhin ka hriat ṭhenkhat chu Mizo Union leh Mizo National Union hria an ni nawk mai. An tunlai hi ka ti’a nia aw! Ṭhenkhat phei chuan an rammut lai thlalak te an notice board-ah an tar a, a ṭhenin Lammuala phul lem a awm hma fe a an parade lai thlalak te an dah bawk. Keini’n “Victor-a tih vel chu an tunlai e mai; Maitawka ngat le” tiin kan inti hmanlai khanglang a, kan inti siniar vel aniah! Kan hmanlai ka ti’a nia aw!

Group hi hlimawm si ninawm si zuk nia!

Hrilhfiah leh rih ang. Group chu group a ni mai. Tu’n emaw group a siam a, chutah chuan min lo telh ve a, tichuan chu group member chu kan ni ta a, pawisa sen a ngailo.

Chanchinthar group te, mifing hlir awmkhawmna group te, uanthuanna group te, vengchhung bil group te, kohhran ṭhalai group te, tleirawl hawklak group te, Korean lam hawi group te,… a tam mai. Facebook chu ‘Grouping Centre’ a ni deuh ber mai. A hman nazawngin an duh duhna group-a min lo add ve ringawt ṭhin erawh a ninawm a, huat hleihtheih bawk si loh! Chu’ng group hrang hrangah chuan kan han titi luih luih mai ah, zia leh hle si ‘ni. Fing deuh deuh te leh inti fing deuh deuh te pawh an awm a ni awm e. All Mizoram Unrecognised Junior Philosophers’ (AMUJP) Meet la huaihawt ila a ṭha tak ang.

Rualpawl nan satliaha Facebook hmangtu hi a tam zawk chu kan ni maithei e. Mi ṭhenkhat chuan ṭangkai takin an hmang mek bawk. Counselling nan te an hmang ṭangkai a, a ṭha ngawt mai an ti. Mahni veng/khua aṭanga chhan hrang hrang vanga hmun danga awmte tan a ṭangkai em em mai bawk. Khawtlangah chhiat tawk awm se Facebook zualko kan hmu thei a, a peih deuh tan phei chuan englai pawhin kan mobile-ah heng chanchin tharlam tak tak hi kan hmu thei.

Khawvel hi a hmanhmawh tawh a, miin internet website hrang hrang kan tlawh kual dun dun peih tawh lo. Hei hi hrilhchawp ngai hauh lovin Facebook ngaihtuahchhuaktu Mark Zuckerberg-a hian a hre kar mai a ni teh chek a ni ang chu, a hmang ṭangkai thiam tlat. Khawvel media lian tak tak te pawh hian anmahni website ai mahin ‘Follow us on Facebook/Twitter’ an tih zel tawh mai hi. An news article te reng reng pawh Facebook account hmangin a ‘Like’ theih deuh zel tawh chu a nih hi. Zonet pawhin Mizo Idol 2011 ah Facebook chu an hman ṭangkai khawp hi maw.

Tunhnai deuh aṭang phei kha chuan mobile phone hmanga facebook kan intihhmuh ṭan a, SMS a nekchep ṭan deuhvin ka hria. Chuti tehchiamin a hautak loh bakah, an GPRS tih vel hi facebook vel nan na na na chuan a muang chhe lutuk lo bawk a, facebook chat-a ‘hringchungnunga’ te ho pawh hi mobile-a FB ṭhin an ni a ti, Renthlei-a Ralte-in.

Ka thuziah chu Facebook ve ngailo tan chuan a va ho angreng lawi si e!

2011-05-02T14:16:00.001+05:30

In Hateful memory of Bin Laden

Put on your MORNING dress

With Black let us CONTEST

He will, of course, be REPLACED

.... Bin-a kan ngai lo che

You have TERRORIZED us

SUCKED the air out of us

Soaring high above us, you BOMBARDED our every place

Through the FIERY days

Through the HELLISH days

And when WTC falls, we want to fight YOU together

Now... you're gone

While there's so many things left to do like KICKIN your ass

Now you're gone, you're gone

Vety daktawr

2011-02-25T22:56:00.003+05:30

@ Vety daktawr te hian an patient te ei hmeks an ching an tia, tak tak ni maw!!!
@ Ti ta sa sa, Vety Daktawr hi Kohhran Upa-ah thlang tling ta ila, "Upa Ran Daktawr....." tihtur an ni angem?
@ Tichuan Vety Daktawr chu... (Ka ti laklawh tlat) ... An patient ten an khawilai nge na an sawi ve thei silova, risk deuh fo a ngaih duh hmel.
@ Ti leh ta zel ila, Vety daktawr-ah hian "Gynae" te, "ENT" te awm hrang ve ta se...
@ Vety daktawr specialist-ah rau rau chuan "Rul specialist" nih ka chaklo deuh ber.

-No offence intended. Ka vety daktawr Pute leh thriante ka fiamna mai mai.

World Cup kan en theuhvin ka ring e

2010-07-13T11:53:00.000+05:30

World Cup kan en theuhvin ka ring e
-Stephen Auhmun

Intihsiakna reng rengah Pakhatna nih kan tum thin a. Kan tlin ta lo a nih paw’n pahnihna. Chutiangin palina te, pangana tal te pawh. Chu chu intihsiakna-in a ken tel a ni. Kan en zawh tak FIFA World Cup erawh kha chu a mak ka ti ve angreng. Pahnihna ai khan Pathumna kha an han lawm zawk tlat ah!

In lo en ve hlawmin ka ring a, pathumna ni ta Germany kha. Khatia Uruguay nena pathumna nih chuha an inkhel zo, an chak chiah kha an lawm teh e. A tuk zan Final inkhelha chak lo zawka tang ta Holland erawh kha chu an lawm tehchiam lo a nih kha. “Pathumna Germany pawh an lawm te chuan keini Pahnihna zawk chu lawm tur kan ni. Hei leh chen min hruai thleng tawh a, thil ropui min tihsak a ni” te pawh tih ve awm! An lawm lo tih lah kha an hmelah a lang reng bawk si.

Kumin World Cup chu beisei aia hmain Football ram ropui an tla phuk phuk mai a ni a, FIFA hotute tan khan mang a ang duh awm teh e. Champion lai Italy an han tla a, chutah a hmaa finalist France an han tla ve leh bawk a. England, Argentina, Brazil te an tla phawk phawk mai. Second Round-ah khan Nigeria te, Ivory Coast te, North Korea, New Zealand, Croatia, Turkey, Russia, Columbia, tih vel kan hmuh hauh loh kha! Khatia an tlak zel te chuan Final khel tur pawh kha an awm lo thei mai dawn ni khan a lang a, rilru chu a hah duh khawp ang.

Kan hmuh, kan hriat, kan ngaithlak leh kan chhiar fo angin kumin World Cup chu beisei phalo tak tak player lar zet zet ni si an tam hle. Ronaldo, Kaka, Messi, Torres, chuti khati. Wayne Rooney pawh U Lalhnaia nen an inang reng – World Cup-ah goal an thun lo ve ve.

Brazil, Argentina leh Latin America ram danga footballer tam zawk te hi chhungkaw rethei tak atanga seilian, harsa taka football khel chho niin an sawi thin a, tak tak a nih leh nih loh ka hre lem lo. ‘Marawhchu, mak tih angreng deuh ka nei. Chutia rethei bakberha seilian ni si, an naupanlaia khawlaia pawnchhe hlawm an petlai video te an nei leh lawi si thin. Keini ramah hian en ta ila, 1990 hmalama piang te zingah naupan lai video (ball pet lai chu sawi loh) hrim hrim nei kan vang ngawtin ka ring. Nge ni’ang a, “Ani hi a la lar dawn! Nakinah chuan rethei taka a seilen dan te hi miin an la hre duh dawn a, chuvangin a pawnchhe hlawm petlai vel hi thla lo la te’ng” titu an awm zawk?

Kan lo upa ve ta a ni ang, 2006 World Cup te, 2002 World Cup te kha ka en ve hman tlat! 2010 pawh ka en.

Mizote hian football hi hmuhnawm kan tiin kan lawm hle niin a lang a, hetihlai hian World Cup-in a nghawng miahloh mi engemawzat ka hria. Chu’ng mite chu mi chi hrang hrang an ni hlawm a, World Cup an en loh chhan pawh a inang lo hlawm.

Pakhat chu a hming Lalnunmawia niin, “Mapui” tiin kan ko a, “eih” a ti thin. Ani hi chuan football hrim hrim hi a en ngailo law law. Tezawka leh Tevez te hi a hre hrang lo maithei. A en ngailoh chhan ka hre lo. A tui vaklo a ni ang. 2006 Final pawh kha kan en dun a, a en ve miah lo. Tintin a chhiar.

En ngailo ka hriat pakhat leh chu “U Kimtea” ania, a thiante chuan “LTKA” an ti. Ani hi chuan a tlangval lai chuan football pawh a khel ve thin a, World Cup pawh a en ve thin. Mahse, 2002 chiah kha mumalin a en. A dang chu a en mumal ngai lo. A chhan : A muthlu thin. Inkhel tan dawnah TV hmaah a thu ve a, a muthlu nghal hmeks a, inkhel zawhah “Tunge chak?” a tia, a tawk mai. 2002 kha chu chhunah kan en thin a nih kha.

En ngailo dang pawh ka la hria a, Brazil a tan thei lutuk ringawt. TV en chi ziazang a ni lo – a ruih bosan zel. Hming thup.

Guwahati – Thiruvananthapuram rel driver pawh khan “Ka en hman mang lo” a ti. A hnathawhna kha ni thum leh zan thum thang a ni bawk a, tihngaihna a vang ve bawk a ni.

Final en lo chiang bang dang ka la hria; Aizawl – Guwahati Capital Travels driver pahnih leh conductor, final zana duty te kha. Ladrymbai dhaba-ah thingpui in chawlh paha an en zawk te a nih loh chuan.

Mizoten football kan lawm kan ti a, ni e, kan lawm ngawt mai. Kan pawl ropui YMA pawhin tournament te hial a siam thin a nih hi. Inter YMA Golf tournament te chu kan neih ngai miah loh hi. Chutiang bawkin All Mizoram Open synchronised baseball pawh a awm lo. Football erawh kan inel tlut tlut. Footballer ropui hming pu ve ta pawh kan awm nawk mai.

“Zico tu-e-maw-ni-a” pawh kan awm a, “Gerrard-a pa” te pawh. Jerry Zirsanga ni silo Jerry Zirsanga ni ve tho bawk si te pawh kan awm. Kha kha a ni mai, Football chu. Mizo zingah “Tendulkar” in hria em? A nih loh leh “Dhyan Chand(mari)” ? Football te chu kan ngaisang em! In zawng in zawng ila chu “Makelele Ralte” te, “Baichungnunga” te pawh kan awm hial maithei a ni. Ka fapa pawh “Pedro” ngat! Keimah tak pawh hi “Gerrard-a pa nutei fanu pasal” ka ni ve tlat a ni.

Kahpah deuh deuhin.

Tun tum World Cup chu German team-ah mihang te an awm ta nawk mai ! His Excellency, mein fuhrer Hitler-a chuan hria se a sa tek tek ang chu! “Achtung! Achtung! Das Auto-ah hlang ula, Auschwitz-ah thawn vat r’u” a ti hial ang. He Germany team-ah hian Juda mi pawh an la awm thuai hial awm e. Khawvel hmasawn dan enin.

Mihang ho hi an daihzai ngawt mai. Nigeria te, Cameroon te, Ivory Coast team te kha en ila, mihang vek an han nia(h)! An va daihzai tak.

Korean ho kha team hnih lai an thawh thei a, an fakawm ngawt mai. A joint YMA ang deuhvin “Joint Korea” hming khan rawn chhuak ta se enge an an ang aw? Engin nge min mawlh ka hre law, Korea-in an khelh apiang khan, commentator te tawng zawng zawng kha “Mizo tawnga dub” ka lo beisei leh ringawt thin. Ngaiah ka neih tawh a ni’ang e. South Korea right back kha commentator te khan “Chaudhury” an ti niin ka lo hre ve ngar ngar a, mak ka ti angreng. Mahse ka hriatsual a lo ni. “Cha Du Ri” a lo ni zawk a.

Hming kan sawi ta rau rau, ka nuam tih zawng a ni leh ta tlat mai, Lawmte.

“Kaka” kha “Anelkaka” leh “Anelkanu” te nen ka hriatpawlh ziah nia! USA ami DaMarcus Beasley pawh kha commentator te tawng ringawt hriat chuan “The marks are Beastly” an ti emaw tih a awl khawp mai. Hming a nei sakawlh riau. A jersey hak number apiang kha “Number of the Beast” a ni ber e. “Landon Donovan” tih te kha a “Dono” lai tak kha Hindi a ang!

Spain ah khan “JESUS” a tel mauh mai! EMMANUEL Adebayor nen chuan unau an nih hmel bawk si lo. Japan khan “Hero” HONDA an nei a, India chuan “Mr. Bajaj”! Chile-ah emawni, “Tello” kha a tel mauh mai bawk. Kumin chu Brazil team-ah ‘Zinho’ an awm mang hauh lova, Uruguay ah khan “Diego” pali lai an awm thung nia. South Korea-ah khan Ji Sung-a nilo “Park” dang an awm ve. “City Park” te, “YMA Park” te, “Kawngsira Park” te an ni mahna!

Hnam hla an sa lai kha in lo chik ve hlawm emaw chu. Kei, ka lo chik mang hleinem! Cristiano Ronaldo khan group stage ah khan an National Anthem kha a sa ve ngai miah lo nia. A hnuah kha chuan a sak ve al al kha. A tenor-in ka hria. Khatia a sakloh chhan kha politics a ni mahna: Portugal – Madeira politics. Germany hovin “Nangma thil ropui” thluk ru-a an sak thin pawh kha a German fir lo ho khan an sa ve ngai mang hauh lo. Oezil, Khedira, Podolski tih vel ho khan.

Japan ho hla kha a bu ang thlapin a mawilo. A tawp dan te kha a laklawh ropui, kan Jana Gana ang mai – a tawp dan kha a mak. Kan Jana… pawh hi ‘fa’ in a tawp tut hi! Spain leh Argentina ho hla kha a thiam ve lo nih a zia phian – a thu (lyrics) a awm ve miah lo a ni ang, tumah khan an hmui an phun ngai lo. A thu awm nise a ram pumpui maia thiamloh vek thu khawiah awm suh. “Oh say, can you see…” pawh kha American player ho zingah khan thiamlo an tam. “In the land of the free and the home of the brave…” tih lai kha chu ka hre ve tlats. A solfa thiam deuh khan Brazil ho hla kha a solfa-in han dah chhin teh u, a mak si. “Soh soh doh, soh doh re mi, re mi fe taaa…” tih vel niin ka hria.

Opening leh Closing ceremony kha an ti ropui ngawt mai. Halpuah leh halmawi chi hrang hrang lah an ngah. Shakira pawhin tlangval tam tak rilru a ti hah thin teh e! Mak ka tih ve mai mai thin chu India ram pawna event liantham hi TV-ah ka lo hmu ve zeuh zeuh tawh a, Chief Guest te pawh an nei ve thin tho bawk sia, inhmelhriattirna leh thusawi a awm ve ngailo bik.

“Tunah technical committee te in thuthmunah lo ding ula; khaile, refreshment sub-committee member te. Ani hi sum leh paia nasa taka min puitu ania, lo ding ve hrim hrim teh se” tih ang chi kha an ti ve miah lo. FIFA President “Dr.” Sepp Blatter leh South Africa-a kohhran hruaitu langsar “Rev. Dr.” Desmond Tutu te pawh khan kutphah tiat vel badge danglam bik ang chi an bel pawh ka hre lem lo. Kan nau pakhat lah chuan an ram hruaitu ropui kha “Rev. Nelson Thangdela” tiin a lo sawi ve chamchi bawk.

World Cup tlem azawng ka en ve ta a, a kuma tin hian thil chhinchhiahtlak engemaw a awm ve deuh ziah nia. A bul tan kum, 1930 kha chu ka la hre hman lo deuhva, mahse an vawikhat telna-ah Uruguay an champion ringawt tih kan hria. Kuminah Lampard-a pet goal, goal leh lo kha a lar viau. “Hun hnuhung-a” Ghana ho penalty thelh nen. 2006-ah Zidane-a’n Materazzi a sik vangin a lar hle a, English referee Graham Poll-a’n game khatah mi pakhat hnena Yellow Card vawi thum a pek a larpui viau bawk. 2002-ah lah Rivaldo na der vial tawp tawp. 1998 ah kha chuan French defender Laurent Blanc leh an goalie Barthez-a te “Lu-Kiss Policy” kan hmelhriat kha. 1994 kha a ni maw, mak tak maia Bulgaria an rawn thlen san ve em em rikngawt kha! Stoichkov kha ka hre ve tat. 1990 kha chuan kan la nau fu mai. Mahse, khami kum khan “To be Number One” a lar berin ka hria. Argentina-in Cameroon an hnehloh nen. ’86 chu ka hre ve pha vaklo, Maradona a lar tih bak.

A hrim hrimin mumal taka 1986 World Cup la hria, tuna nula-tlangval la ni bawk si an awm a nih chuan, chu’ng mite chu an puitling tawh el el ngawt ang! Khatih lai khan Mizoramah TV a la awm mumal lova, Cable TV phei chu khawiah! ‘Doordarshan’ pawh ‘India’ a la ni. ‘Perfume’ pawh ‘Scent’ a la nia, Hockey an ‘thah’ dan pawh captain ve vein an tiangkawm inkawkalhin ‘thlik-thlawk-thlik-thlawk-thlik-thlawk –thlirrrrrrrr’ an la ti thin. Ka hre ve pha tlat nia.

Tichuan kumin World Cup chu Zulu naupangin “In ang awww” a rawn tia, chutah half-time ah Shakira-i’n “Uak-a, Uak-a” a rawn ti leh a, khap burna ramah a inhmeh thei lo fo mai niawm tak a ni.

Politics kha kan sawi a, ka’n belh te’ng. Khatia Spain an champion khan an defender, Barcelona Captain ni bawk Carles Puyol-a’n trophy a tlankualpui lai vel khan Spain flag nilovin Catalunya flag a bat vel a nih kha. Awmzia a neih duh hmel ka ti.

Politics chu sawi leh lo ang. Ka hre ve tak tak lo.

Zodiac Sign

2010-04-12T11:40:00.001+05:30

Aries ka nih vang nge ka hre law, Zodiac Sign hi ka ngai thutak ve hlek lo nia

Hming pum

2010-03-31T15:30:00.002+05:30

Mi thenkhat an buai thrin - ram pawnah te. A tlangpuiin Mizo chuan First Name, Middle Name etc kan neilo a nih hi. Tichuan, Passport dilna-ah te, Online-a form fill-up a ngaih hunah te buaina a awm ta thrin.

Kei chuan hming hi a 'set' kimin ka nei thlap mai. Chuvangin, passport dilna velah pawh Surname tih angrengah ka buai ve dawn lo.

Buaina ka neih erawh - Passport chu lo nei ta tehreng pawh ni ila, chu ka passport chu hmang tangkai tur chuan rampawna zin a ngai a, PAWISA ka nei lo!!!!

Thu ho chi hrang hrang

2009-12-07T12:14:00.002+05:30

1. Mawngmirh vangin AIIMS ah ka inentir ve a, doctor chuan dawhkan bawhin min bungbut tir a, a hawlh a hawlh a, a trawng zuah zuah reng bawk. "Engemaw a tih le?" tia ka va hawi phei chuan doctor zirlai an lo thru thrup a, uluk zetin ka mawng chu BIG SCREEN-ah an lo en

2. Naupangin thil an eia tui an tih viau hi chu puitling hian han eichhin ila, a lo tui viau zel

Ka phai zin thu

2009-09-09T16:49:00.000+05:30

A Hmingin Phaiah Te Ka Kal Ve Tawh, A Hming Mai Maiin

¢ Stephen Auhmun

Pawl kua kan zir kum a nia, ka la hrereng mai, December thla a ni nghe nghe, kum 1994. Kohhran programme-ah Guwahati kal a ngai a, kal hma ni chiahin kal ve turin min ti a, ka va han phûr tehlul êm!! Kolasib-ah kan chhûngte an awm nual avangin he hmun thleng hi chuan ka kal ve fo a, chuti tih lohvah chuan ‘Phairam’ awm dan tur hi suangtuah pawh ka suangtuah thiam lo a, Bhaga phai phei kawng chu engtiang taka ngîl nge a nih hre turin truck driver hmelhriat pakhatmah ka nei lo bawk. Ka vawi khat vairam hmuhna tur a nih ve tak chu.

Ka châk et et a ni.

“Engatinge night bus hi zânah kher an tlân thin le?” ti thintu kha a seat dûpah ka thu thâwp ve ta sat mai. Bus chhûngah chuan ka mu mang lo a, mumang pawh ka nei lo. Kan kal thla zel a, mi’n ‘Meghalaya chu a vawt lutuk’ an tih ka hriat ve tawh avangin mi an ve ngei ka duh si a, Sonapur lei kan han thleng chu vawt ta riau hian ka han hre ve bawk a, mi ningkhâwng chu man ve tak ka ni.

He lei (bridge) kan han pel fel chu, awi karei karei! Kan bus min suam ta mai. Kan bus suamtute lah chu henglaia ‘vai’ kan tih ang, an hmêl kan hmuha kan duh theihna tura hmel mawina reng nei lo te an ni hlawm a, thinrimthlak tak a ni. Bus hnunglamah kan chuang a, kan vannei ngawt mai ka ti. A hmalama thuho kha chu an neih zawng zawng an laksak vek hlawm a; ‘zawng zawng’ tih lemah an thil hlu neih zawng zawng. Kei chuan engmah ka chân ve hauh lo. Bus hma darthlalang chu heng vaichhe ho hian an vawchhe bawk a, driver an hliam bawk. Theiriat an tia mawni, Melriat an tia mawni, Khleihriat an tia mawni, Chhûra ûmpui mu hriat an tia mawni? Chumi khaw police station-ah chuan kan in-report hnu chuan kan kal leh ta poh a, kha’ng kan chuanpui te thil hloh kha hmuhkir sak leh tak maw?

Shillong chu a mawi ka ti hle mai; a vawt ka ti kher mai bawk. Bus-a kan chuanpuite zawng zawng chu he hmunah hian an chhuk phiar a, keini pali chauh chu Guwahati thleng tur kan awm ta, driver pakhat chauh nen. Bus darthlalang keh leh zan khawvawt avangin a tlan chak theih si lo a, Shillong leh Guwahati inkâr pawh dârkâr ruk zet kan tlan a, zan a nih tawh avangin Borapani pawh ka hmuh loh phah.

Guwahati-ah chuan ni li kan châm a, kan haw leh a, kan tluang lo leh pek. Direct bus a awm loh avangin Badarpur thleng ticket kan nei a, he hmun kan thlen hian vaihovin min khawih an lo tum a nih chu!! Hemi kum hi driver Lalsangzuala thah a nih kum kha a ni a, Aizawla vai dawr tam tak suasam a nih kum kha. Ka la nau ve bawk a, ka hlau teh asin! Kan awmna hotel an rawn hual khup khup mai a, kan thianpa pakhat phei chuan sawi se, ‘vaiho chu an tam khawp a, a thimin an rawn thim mup mup’ a ti hial awm e. Kan vanneih asiamin kan hotel thlenna pa-in min lo chhan hlauh a, a lawmawm dangdai teh asin. ‘Mizoram ni ta se kha vaipa’n kan chunga a tih ang kha ka ti ve ngam ang em aw?’ ka ti hnuhnawh fo mai. Zuk zawnchhuah leha Grape Wine khilai hial tur a ni - a rui kher nâng!

Ka damchhûnga a vawi khat na’n kum 2001 khân rêl ka chuang ve chauh. Kohhran zârah bawk. “Kerala kal tawh zawng thingthi rawh u” ti ta se a khûp bâl zingah ka tel ve thei reng tawh mai. December thla bawk a ni a, chhim kunah khuan kan zuk kal a, thla khat zet kan thang. Min hruaitute an fel a, kan kal lamin harsatna engmah kan tawk lo.

Haw lamah a ruala kan haw theih tak loh avangin chinchâng hre lo thah mi pariat kan haw tlâng a, kan buai angreng khawp mai. Guwahati thleng tur rêl direct kan neih loh avangin Chennai leh Kolkata-ah rêl thlak a ngai a, a manganthlak hle. Rêl nan loh palh te kha kan han hlau lailêng khawp a, a chhuah hun hma darkar li-ah chuan station-ah kan thu rân tawh zel. Hemi tum hian alawm, hmun tlawh tam nih ka duh avang khan rêl din apiangin ka chhuk a, Salem, Vishakapatnam, Coimbatore, Bhubaneshwar leh khaw lian dang dang ka kal tawh ka tih ve zuah zuah theihna chhan pawh ni. Insawitheih nuam ti mi, kei ang tân chuan a tihchi zêk asin.

Ka nu laizâwn te nena Kolkata kan kal zet kha aw! Rêl bawkin. Vai milian choka anga mawm hmak mai vek hi an ni a, rêl kal laiin zunram an thiar ngam silo; stationah toilet hman phal a ni bawk si lo! Buaithlak hlawm tak an ni. Hmeichhe bazar pui chu a hahthlak em mai, nupui pawh hi neih loh tawp mai a nia ka duh rum rum ni!

2003 kum kha ni ta-in ka hria, zirlai hruaitute hnung zuiin Guwahati-ah bawk kan kal a, motor kan keng a, nuam kan ti hle. Mizoram House kawtah tak mai khuan kan motor chu maruti car-in a rawn su nghing lawih pek a, Badarpur ang mai khan phai vai hmelchhe rimchhe tawngkam chheho an rawn pung khawm leh chiam pek. Ka thiante zawng leh kan driver kha chu Mizoram House-ah an tlan lut hman a, motor seat hnunga chuang ka nih avang khan an tih ang chu ka ti ve hman ta lo! Vaiho kuttum leh kutphah leh pheikhawk chu ka bek te, ka dâr te, ka biang te, ka mawng te leh a remchang apiang chuan ka lo block ta siah siah mai lo thei lova, ramdangmi hmusit mai lova thiana siam har ka ti ngei mai, khami tum zet kha chuan. Anni, ka hmai leh taksa pêng danga an kuttum rawn thlahdah tute pawh khan an harsat niin ka hria, min tihdan êm êm kha!

PCO pakhata min hnuklut tu kha i titha e! Tikhan min lo ti lo la chu Vairengte atanga Aizawl inkar YMA ten kawng tluanin min lo hmuak mai thei a ni. Ka duh hleinem, rih ana; pawndum a tel ngei dawn si a! Ka neih zawng zawng Rs. 500-in ka inkhulchhuak ta a nih kha. Tu berin nge ka pawisa kha chang ta ni?

Tlemlai deuhva Bagha phei chhiat êm êm lai khan ka thianpa Hruaia nen kan kal ve bawk tak e. Dholai-ah kan chuanna bus a tâng a, loh theih lohva zan riah a ngaih avangin mi dawr bathlâr-ah kan riak tawp. Nge bus chhûng a lum viau vei. Thosi seh hi thak kher lo se, natna hrik te hi paipawn khanglang lo se, thlawk ri vê vê kher lo se chuan an khamkhawp thisen thehchhuah hi a lo uihawm hauh lo tih hemi zan atang hian ka hrechhuak chiang khawp mai.

Mi thenkhat chuan phai kal te hi eng he hu-ah an ngai lem lo. “Naktuk enge i tih dawn?” han ti ila, “Delhi ka zu kal lawk teh ang,” te hi an ti sam leh êt thin; chu mah mah thlawhtheihna in. Keia phai kal ve tur hi chuan |huampui ka pan tlângpui a, midangin Lêngpui an pan laiin. ‘Pui’ theuh theuh kan in pui hleih hlawm ngawt mai. A la kal ve lo te lakah chuan ka intithei ve em em reng tho nia. Tih tak êmah chuan ka thian thenkhat, night bus chhûng pawh la hmulo leh Silchar a awm tak tak pawh ringlo an awm ve tho êm! Ka thianpa pakhat chu a vanneih a siamin (?) serious vak lovin a damlo hlauh a, Guwahati a hmuh ve phah tak e. Chuti ni lo se khawiah!

Keimah Ramfangzauva.

Zeldin Titi

2009-08-13T15:45:00.001+05:30

Zeldin Titi

Adama leh Evi hunlai khan mobile te hi lo nei ve tawh se chu aw! Network Busy a awm khat ve khawp ang. ‘I biak duh line hi…’ chuti khati te kha a Aramaic emaw a Hebrai tawng emaw khat khan an sawi zuah zuah thin ang chu.

Huan sir kil khawi’ maw laia Adama lêng kha Evi’n an missed call vel ang a; a nih loh leh ‘Koge om? Nai ltk ce. Kom tur dag an om c lo. Lo haw tuai2 rh’ tiin SMS a thawn thin mai thei a ni. Adama-te pahnih kha khawvela hmelhriat ngah lo ber pawl an ni hrim hrimin ka ring a, VC inthlanah chuan an tling lo ve chiang ngawt ang.

Babel in sâng an sak lai khan 'crane' awm tawh se chu an hna a sâwt ngawt ang mawle! Black & Decker electric drill te kha han nei se chuh! Balu leh brick ilo fahran thiarveltu truck driver te khan an bungraw phurh kârah ‘a sen chi’ phurh rûk nachâng hre ve hlawm tak maw? Pân hnah leh zikhlum tukri ringawt an phurh tel chuan an hlâwk nêp deuh ngei ang mawle.

Nova khan Vishakapatnam lawng tuk thiamte rawn hauh lovin a lawng kha a sa zo thei a, a fakawm ang reng. Sarivaithun leh thangnang khalhluh tur kha an ramah a vâng ve hlein ka ring thin. Broiler âr chu a harsa lo ang – a ramtla chi an ni lo a, mi vulh lai, a bâwm chawpa khai nawlh kha a ni mai dawn a. Thosi leh vaihmite a lo hmaih lui lo kha chu a pawi ka ti thin – a bikin Silchar kal nikhuain.

Lota nupui kha chi satliah nge a nih ang 'iodized salt' ngat? Bêlchiang ila chu TATA Salt, ISI chhinchhiahna chuang a ni mai thei a ni. Ninevi khaw mipuiho kha chu bei an ti dawng ve thin ngawt mai. An naupan lai atang rengin lehkha an zir peih lo hlawm ang chu aw! Thu awih lo hlawm lutuk mai. An tlangvâl te paw’n Dendrite hnim nachâng te kha an hre mial mai thei a ni.

Isaka khan Esaua leh Jakoba hnen atang khan Birth Certificate lo phût nachâng hria ni se chu khati mai mai khan ‘a dil loh zâwk’ malsawmna a pe lo tur!

Jakoba fate zingah khan zaia intihsiakna-a lawmman la te, boxing-a semi-final thleng te, buhfai bag sehkkawh zo te, Hindi thiam deuh te, sports goods dawr nei te pawh lo awm ta se a mak vak lo ang. An rual ang reng em mai. Aigupta lal te pawh an nih nawlh nawlh rêng kha.

Josefa khawsakpui tumtu, Potifer-a nupui khawsazia hawr hawr kha! Oriflame, Mary Kay tih velah a insêngso nasa ve thei ngawt ang – awm se chu.

Sakhaw lam kaihhnawihin zêldin thu kan bâwl a, mi ngêng a chhun tan tlat mai!

Thlânrawkpa Khuangchawi kha! ‘Thlânrawkpa’ a ni hrim hrim hi a pui ve tawh hrim hrim. A hrim hrimin ‘Thlânrawkpa’ sâp hming hi ‘Tomb Raider’ a nih duh hmêl. ‘A thei hlei hlei a thei hlei hlei’ an tia, ‘Thehlei’ a lo ni ta a. A âwm ang viau. ‘A zawhtê mange’ an tia, ‘zawhtê’ a lo awm leh a. Hei pawh a nih duh hmel khawp mai. ‘Hei chu a nghawng a va sei ve mawle; sanghawngsei ti mai ang’ an ti leh te pawh kha a la dik thlup. ‘Kêl’ kha engvanga kêl ti ngawt nge an nih erawh ka thil hriat châk a tling.

“E! Hei chu a va han kêl kher em ve e! Hming dang vuah chi pawh a nih nek loh hi. Hming dang kan pêk chuan ‘a inhmehlo lutuk’ tiin thangtharin min la dem mai ang. A hmêl en reng reng paw’n kêl chiah chiah a nih hi. Sawi thui duah pawh a ngai lo. Tihngaihna dang a awm tawh lo. Kêl i ti ang u” tiin Organising Committee chuan thuchhuah siamin an tarlang ni ngei tur a ni.

A nung chunga Pi Hmuaki an phûm avang khan Shakespeare-a kha a lâwm hian ka ring alawm mawle! Chuti ni lo se Pu Shakespeare-a te, Pu Mozart te ho khan hla phuah tur an nei tawh lo ang; Pi Hmuaki’n a phuah khalh vek dawn si a. Lo phûm lo se chu kan pi leh pu ten ‘Jai Ho’ an ti thap thap anga, hmun thenkhatah phei chuan an lo ‘Bematuale’ tial râng nuaih nuaih ang chu.

Hlaphuah kan sawi ta law law bawk a; tunlaia phuah chu ni se, “Lêngi nena luia lengngha kan chhaina” tih te kha “Mary nen last week-a steam bath kan tihna” tih a ni mai thei (A bass-in ‘Facial leh manicure pawh’ lo ti bawk ta se).

Khaw khat sai ram chhuahnaah ‘insulated carrier tiffin box’ nei kha chu an vannei awm bik. hianten aidu leh chakai an hmeh pawlh mawlh mawlh lain a tûk thum tûkah pawh chicken biryani with onion garlic an la ei ten ten thei dawn bik tlat. Dual sim phone neih a chi viau ang – midangin signal an hmuh loh lai paw’n signal an nei fo thei bik anga. An ramchhuak, sai padâwp an veh dân dân lai kha in lamah nula hovin big screen-in an lo en ngei awm sia, tlangval tan mark score tura tan a ngai ngawtin ka ring.

Khawhar ina lenkhawmna-a soundtrack neih that leh that lohvah vêng inelna a na phian mai thei. Live music-a ti thei vêng chu an tam vakin a rinawm loh. Khawhar in a len vak loh phei chuan a hnawk ang. Han ti ngawt ila; tun thleng pawh hian vêng tinin khawhar inah live music chu kan la hmang reng tho chu a nih si hi!

Chhûng tinin mahni ina zu bêl an neih lai, lal ina zu tui tha tha an tlan thin laite khan a fing fâl deuh tân chuan zu in phalna license lo neih thlip thlep a tha ang. A hunlaiin tangkai tam lo mah se tu leh fate rochun atan, nakin hun atan a tha dawn tlat.

Tui chawi nan khân ûm an hmang thin kha a ni a. A nachâng chu hria se êmping kha han laminate hmiah mai se, a hranpaa ûm phurh ngai lovin tui an chawi thei ni mai tur!

Khatia Lal Bengkhuaia’n sâp naupang hmeltha zet Mary Winchester a hruai haw khân a khaw thalaite zingah autograph dil nachâng hria an awm hauh lo mai kha chu a history zawnga chhût paw’n thil pawi a tling. British Museum-ah te khuan a lo awm mial em aw? Khutah khuan khawvel thil pawimawh chi hrang hrang a kim riau an i.

Pipute tawngkauchheha ‘Vân laia tla ang’ tih kha ‘Skydiving’ sawina a ni thei ang em?

Thil dang daih - thirsakawr hmuchhuaktu khan a siam zawh chiah khan a chuang chhin nghal ang em le? Keini khalh zirin ‘i tlûkna tur lamah cut zel rawh’ kan ti ang hian a tlûkna tur lamah a cut ve zel ang em le? Kan tlûkna tur lamah kan cut hian kan cut-na lamah kan tlu zel tho chu a nih hi!

A tlûk ve tho ka ring.

History kan en chuan kan hria ang a - Hundred Years War kha. Khatia kum za zet indo tur chu an la run ve fein ka ring a. Sipai za hotu thusawi tur âwm ang pawh a hriat theihin ka hria : “Hei, in hriat angin kum za zet kan indo dawn a ni a, history ziaktuten Hundred Years War tia chhinchhiah an tum miau mai si a, kan tan hle a ngai dawn a ni. Tunah ‘a lumûm’ in la ni rih a ni mai thei e. Mahse mangang suh u. Kum 10 (sawm) danah pawh promotion hmu ta ula, indo kan zawh hunah meuh chuan in lal tawh bêr bêr viau ang,” a tih duh hmel.

Animal Planet, Discovery Channel tih velin an la mamawh dawn tih hria se chu hmasâng Dinosaur ho khan an chetla lai vel video-in thla an lo la thlip thlep tur ania. Tunah lêm computer hmangin ‘a âwm ang thei ang berin’ an siam chawp a, a buaithlak riau.

Mihringte ai hian ramsa/ran te hi fingvâr zâwk (intelligent?) ni ta se, keiniho hi ‘mi huan’-ah bâwm chhûngah min dah ve khep khup ang a? Zâwng rual inbakkaih te hian thinrim zetin ‘zâwnga! zâwngsen’ an in ti ve phiar phiar mahna!

Kan sawi ang hian ran te hi lo fing zâwk ta tak tak se vawkpui tân bra hrên a hautak âwm reuh.

Sai diaper chu a lian dawn teh e. Huggies Dry ngat an hman phei chuan an in sêngso ve viau ang. An puitling har ropui si.

Khawpui lûn lai deuhvah chuan traffic police atan octopus an tha khawp ang.

Pu PL Lianding(pui)a leh Hmingsânga te chungah sakawr an chuang ang a, a inkawpin mihring tawlailir an hnûk mai thei (a hunlai azirin Wells Fargo tih emaw Assam Rifles tih emaw a intâr mahna). Phuihnam a awm remchan chuan uiin Zefir Mapuia talh phêt an tum bawk âwm si; an han rawh then thâw angah. Vawkin Mafaa leh Mamuana an sêr anga, zawhte malchungah Hruaia Chawngte a thu muthlu lep lep bawk ang. Beramin LPS Pro Fight Championship Vidpuia hmul an mêt hauh hauh mai dawn. Vaki-in Remruata Renthlei tawng an zirtir zet zet tur chu a hmuhnawmin a ngaihnawm viau maithei a, Uchangin Remruata Tonson leh Zoa Tlau an rêp tûr erawh...?

E khai! Hei chu ti leh lo ang. Ka til te hi lâk an tum riau riau ang e. A chi loh. Ka ti tak tak. Hetiang hi chu a uanna chi miah lo a nia!

Hming leh bawk

2009-08-13T15:41:00.000+05:30

Stephen Auhmun

Hmânah, Rambuai hnu si-ah khan ‘Hming’ chungchâng ka ziak tawh a, chhiar a hlawh vak lo a ni ang, khawlaia min chibai lâwp lâwp ka tawng khât em mai.

Ka tih tur nei lo ka inngaihtuah lungpuam a, chhunzawma han tui hnih (Double water?) ka châk riau nia. Hming hoh theihzia hi!

Pâwl pakhat hian London atangin Mizorama an pawl dinhmun enfiaha rawn tlawhtu tur mikhual an nei dawn a ni awm e. “Hei, sâp ram atangin sâp mikhual kan nei dawn a, a hming chu Dr. Whitewash Commoditius ania, nang sâp tawng thiamah airport-ah lo zuk hmuak ta che” tiin pawl hruaituten an mithiam an tir thla a, an sâp hmuah chu a lo thleng a, NEGRO a lo ni e an ti. A hming atang ringawt chuan hriat a har bawk a ni ang.

Hming hi kan buaipui khawvel ngawt mai. Mizote’n Negro kan tih maiho hi kan hria ang a, USA-ah chuan tunhma chuan ‘Black Americans’ an inti thin a nih kha. Hnaivai deuh atang khan an rawn chawrchhuahna ram changchawiin ‘African American’ an inti a nih hi. Heti a nih chuan Africa-a la awm Negro-ho hi ‘African African’ an ni ve mai em? Hming dangdai tak chu a ni. Ka hmuhchhuah!

Mizo tawng duh fir deuhten ‘Hming chu kan sa thin a, kan phuah ngai lo’ an ti a, eng-a-pawh chu lo ni tehreng se, awmzia a neih leh neih loh te hi pawimawh tak maw?

“Thangmawia kha i hria em?”

“Tu Thangmawia maw? Geneva kal tawh kha maw? Nge chhiarkawp thiam deuh kha? Vaihlozial leh XXX Rum ti thei zet kha em ni zawk?”

‘Thangmawia’ theuh theuh an ‘thang’ mawi dan a inang lo hlawm teh e!

Rotluanga ka hre nual mai! Pakhat chu keini Holy Roman Catholic-ho berampu Bishop Stephen Rotluanga a ni a, ani hi chu ‘Stephen’ ve tho tih takah a tluang purh mai.

Rotluanga ka hriat pahnih chu Ho-Tluanga ni zawk awm tak an ni. Thu ho an hre hnem dun hle. Pakhat phei hi chu sakhuana lama ro ve tak a ni a, a hming thluk pawh hi ‘ka puan pho a ro’ tih-a ‘ro’ thluka thluk tur a ni - a hming hi. Rotluanga ka hriat pakhata chu ‘Ruitluanga’ ni awm a ni.

Vêng leh khaw hming thenkhat pawh hi han ‘twist’ remchâng tak tak a awm. Tamil Nadu state-a Vanakailamrapatnilingam ang te hi. Hetiang khaw hming hi awm tak tak ta se an primary sikul zirlaite an khawngaihthlak âwm. ‘Bye-heart tur a sei em mai’ tiin a khaw hming tawi zawk Tut-ah an pêm phah duh hial ang. Tut sawi tâkah chuan khawvela address tawi ber pawl chu ‘Nu-i, Tut’ tih hi a nih duh hmel.

Tlangnuam-a pianga seilian ka ni a, kan veng hming ang hi a ‘common’ lutuk a, a engemaw zawng takin that lohna a nei. ‘Kolasib’ hi a tha ang reng khawp mai. Eng ang pawhin google-ah han zawng ila, a ang hi a awm lo reng reng. Khawiah emaw chuan ‘Cola-Cheap’ a awm mai thei e. Chu khuaah chuan Coca Cola a tlawm khawp ang. Hetia ka tih avang hian mi rilru zim tuemaw chuan min lo haw leh ringawt emaw ania’nga, pawi ka ti dêr si lo a! ‘Veng hmangaih lo’ min lo ti leh thawt thawt ang chu!

Kan nau pakhat chu Hruaitluanga a ni a, amah ka belhchian châng hian ‘Tuaitluanga’ ni zawk se a inhmeh zawk ka ring fo. A nih loh paw’n ‘Chuaitluanga’ te emaw ni ta se.

‘Dinsanga’ hi Babel in sâng sakna-ah a tel ve duh hmel hian ka hre thin a, tu’n lo haw lo se, ‘Muanpuia’ te’n mi an han vau khur khur mai hi chu an inhmeh lo tih châng ka nei.

‘Lalhmachhuana’ inkhawm ngai hauh lo ka hre nual a, a then phei chu ‘Nupuia chhungte Hmachhuana’ tih zawk âwm an ni.

Ka hriat pakhat phei chu ‘Retheih hmachhuana Chapova’ ka ti rilru. ‘Dul-Hmachhuana’ te pawh an awm a, hei phei chu ka phuahchawp lova, hriatpuitu ka nei thlap.

Kan hmingah hian ‘Lal’ kan hmatheh ang reng a, hei pawh hi bihchian a tul. Mi thenkhat, an hminga ‘Lal’ tih tel te hi zawt ta ila, a then hi chu ‘Sailo Lal’ behchhan te, Rajput Lal, Mughal Lal, Tuqhlaq Lal, Khilji Lal behchhan te an ni maithei a, ‘Lal Mohan’ behchhan te pawh an awm ta ve ang. ‘Lal Mohan’ chu ‘Rosgulla’ ai chuan an tawngkam pawh a thlum zawk hrim hrim ang.

In hming te hi kan phuah thin a, ‘Villa’ a lar hle; ‘Rûn’ nen. Kan thianpa pakhat Ngurthansanga Sailo in chu ‘Suangtuahna Lipui Rûn’ a nia, a sâp tawng chuan ‘Magnificient Lake of Imagination Villa’ tihna ni maw? A thenawmpa in kha chu ‘Dahlauna Tuihâwk Rûn’ a ni maithei e.

Footballer lâr Rooney hi Mizo chu ni se a in chu ‘Rooney Rûn’ tih sak ila, amah hi chuan a nachâng a hre dawn dêr si lo a, a lawm ve ngawt ang. An inneih mohruai ho pawn “Rooney-a Rûn in chhungah, Rooney-i a lawi dawn e” an ti thap thap ang a!

Mihring hmingah bawk chuan lo let leh ta ila. Amah chu milâr a ni a, ‘Mafa-a’ a inti thin. Internet Google-ah bawk he ‘Mafaa’ hming hi ka zawng a, ‘Miami Academy of Fine Arts Association - MAFAA’ tih vel a hmasa pawlah a rawn lang. Lâr a intih vei nen.

Zozam-a a thuziak kan hmuh thin Pu HC Vanlalruata hming hi hnam dang hnena chiang taka hrilh dawn chuan ‘Aids See Vuhn-lull-rooata’ tia hrilh a ngai. Mak tak a ni. ‘Lalvawna’ tih te hi saptawnga ziah dawn chuan ‘Lull-Vaughn-uh’ tih a ngai tlat.

‘Henry’ hi mak ka tia’ ni. Keini’n ‘Hen-ri’ kan ti mai thin kha a nia, Europe football kan en hnuah ‘Awn-ri’ a rawn ni tha leh vel. Tunah chuan kan zaithiam zingah pawh ‘Awn-ri Varte’ tia koh ngai pawh kan neih phah ta hial. A nau zaithiam hmeltha lâr zet pawh hi ka hnam dang thian pakhat chuan ‘Mummy Varte’ niin a hre tlat pek a. “Nula a la ni bawk sia, ‘Mummy’ in ti bawk sia” a ti a ti mai.

‘Hmangaihi’ nih te hi a tha. “Heti teh hrep chuan kan innei thei ta lo a ni e. I duh duh la la, chhuak mai rawh, HMANGAIH”tih te a ngai tlat. “Ka hmel huat zawng tak i ni, HMANGAIH”

Pasalte tan chuan nupuite ‘Ngaizuali’ an han ni vûng mai hi chu a thlamuanthlak âwm ngawt mai. Min huat em em lai paw’n ‘Ngaizuali’ an han ni tlat angah!

‘Hmingsanga’ hi ‘|hingsanga’ ni zawk tur a ni. A nih loh pawn ‘Hîngsanga’ te ni ta zawk se a inhmeh ang.

Rotluanga chungchangah khan let leh lawk ila.
“Tunge i hming”
“Zefir Mapuia”
“I pa hming”
“Zefir Hausiama”

Mizo hi chuan hnam hming kan dah hmasa ngai lo tlângpui a nih si hi.

Sap sikul chhuak tih takah sap hming hi chi hrang hrang sawmhnih chuang ka hre ve a, mak tih deuh deuh ka nei nual.

‘Julian Troubledwaters’ tih te, ‘Valentino Police-catcher’ te hi. Milar kan hriat theih chinah pawh ‘Southgate’ te ‘Woodgate’ te, ‘Townsend’ te an awm hi. |henkhat rilruah phei chuan ‘Seaman’ te pawh a lang ang chu.

Mizo zingah hming inang kan tam lutuk tiin hmanah ka sawi vak vak tawh a, keini chang kan lo ni bik lo tih tun hnuah ka hre ve chauh.

Tun hnaiah hna lam thil vangin sorkar laipuiin a rawn tirh ‘lal’ deuh deuh te lo dawngsawngtu-ah vawi thum ka tang a, hmun hrang thah - Chandigarh, Manipur leh Delhi atanga rawn kal an ni na a, an hmingah ‘Singh’ a tel vek! Sardarji an tel miah lo lehnghal!

India rama ‘Singh’ tam zia hi! ‘Singh’ ringawt hi sing tam tak an awmin ka ring a, Punjabi phei chu ‘Singh’ ni deuh vek tura ngaih an ni. Te ti ila, an zaithiam lar te chu ‘Daler Mehndi’ te ‘Sukhbir’ te an ni leh lawi a.

Kan Manipur thenawmah pawh khian Singh hmingpu an tam viau niin an sawi a, a dik ang - ka hmelhriat pakhat pawh a hming chu ‘PC Sharma’ a ni tlat. “Now, let us request Mr. Singh to sing a song”

Keini Catholic ho hian Mithianghlim hming kan chawi thin a, kei pawh Stephen ka nih vah mai hi. Kan thianpa pakhat pawhin fapa a nei thar ve a, hming sak tur an hre ngang lo a nih hmel a, Bible an keu an keu a, a tawp a tawpah ‘Nebukadnezzar |hattumhluana’ an ti ta a ni awm e.

Hnam hming sawi takah chuan miin ‘Auhmun maw nih?’ tiin makti takin min zawt fo? “Chu chu Irish hnam pêng pakhat emni?” min tih loh leh “Russia kehdarh ta-ah khan a khawi ram berah khian nge Auhmun ho chu an awm?” min ti fo. A âwm viau. Ka hmêl chauh en an ni thin bawk a.

Keini AUHMUN ho hi Pachuau tha mi, Chuaungo (em em) Auhmun kan ni ve tlat. Khawvelah tu tu hi nge Auhmun min tih chuan ka chhanna chu “Kei leh ka fapa” tih a ni rih. Inti Auhmun satliah ka ni lova, ka phuahchawp pawh a ni bawk lo. Tlat mai a!

Ka fapa nen hi chuan Chuaungo Auhmun laktlak awmchhun kan ni rih tlat - official tak chuan!
A saptawngin -
“What’s in a name?”
“Alphabets!”

MLA candidate

2008-12-07T20:02:00.002+05:30

MLA candidate pakhat kha thuneituten an va han tiduhdah ve angreng tak e aw! Party lar fahran lo hminga in candidate a ni bawk a, PSO atan pawh NCC tiang keng an pe a, an inzui ve hnak hnak.

Uang zelin hnehna chu kan chang ang

2008-12-03T12:51:00.001+05:30

Pa ti thlip thlep, invawng fel tak a ni ve bawk a, kawngsir mitdel zai hnena tanpuina a pek pawn receipt a dil thlap zel

Obama Bin Laden

2008-11-28T16:26:00.002+05:30

US President atana thlan thar Barack Obama chu a nu leh pain hetiang hian hla an lo phuahsak thlip thlep tawh a ni awm e:
"O-ba-ma i chun leh zua ten, kan hmangaihin kan duat a che. I lo seilen hun kan nghakhlel"

2008-11-23T15:24:00.001+05:30

khhhhrrrriiiiimmm

PL LIandinga

2008-11-23T15:00:00.002+05:30

An sawi PL LIANDINGA

Tuaitea

2008-11-23T14:47:00.000+05:30

This is KOLASIB fachuam TUAITEA

ELECTION UANG

2008-11-23T11:19:00.003+05:30

1. Election Commission a strict thar bawk a, Observer te pawhin an duh fir khawp mai. Observer pakhat phei kha chu a strict lehzual angreng a, kawngsira Upa Pawl Jubili lungphun te kha a phawitir a, zunin banga 'hetah e suh' tih inziak te kha a Hindi-in a translate tir vek.

2. MLA thlan thar a ni ve a, a bial chhung khaw hrang hrangah zunin a siamtir a, a bangah 'Constructed for Mr. So-and-so under MLA LAD Fund' a tihtir kelh kulh.

3. Road Roller-ah 'URGENT ELECTION DUTY : DO NOT DELAY' tih tar ta ila, kan kal chak phah deuh sawt ang a!

UANG

2008-11-17T20:16:00.002+05:30

1. Tunlai hian Rs. 500 note lem a tam hle a, a tak pawh a ang hlawm hle. A tak a anlohna awmchhun chu Gandhi-a zuitute zinga a hnuhnungber hian duh aiin a rilru a pe tawk lo deuh.
2. Blank paper pakhat chauh kan nei a, a aia tam kan mamawh a nih si chuan kan neihchhun kha xerox mai tur.
.... to be continued

Maggie hla - A KAWL leh PAITE version

2008-11-10T15:25:00.003+05:30

Maggie hla 'He-na-na' chu tunlaiin Kolasib TV ah a lar hle mai! Chutih rualin a 'KAWL trong' leh a 'PAITE trongin' he hla thluk ang chiah chiah hi a awm bawk a, an lar phah hle. A khawi ber hi nge a 'ori' a hriat tawh mang loh. Paite version hi chu gospel tho a nih hmel a, a KAWL version erawh hi chu a gospel hmel lem loh. Maggie hian en ve tawh tak maw! TAWIA..... Youtube-ah lo dah teh - A KAWL leh PAITE version te hi!

Mamuana leh A Nupui

2008-11-06T14:27:00.003+05:30

Neih a tum ta lo emaw tih hnuah Vanlalmuana, chanchinbu awmlo Y2GOAL EDITOR chuan nupui a han nei ta poh chu aniah! A nupui hian 'a hmel a hmuha a duh theihna turin hmel mawina engmah a nei silo'
Vanlalmuana, Muanpawisawia chu! Pawisa a nei silo, pawisak a nei silo; mi chhiatna a hre thei si, mi kher a peih bawk si. Tuemaw tai deuh kher lo hi chuan thil sawi te hi a thiam lova, TAIKHERA a ni deuh ber.
Tu chanchin emaw han sawi ila, 'additional secretary' emaw tih mai tur hian belhchhah tur a nei ngei ngei. A chanchin kan sawia tana ngaihthlak nuam lem lo tak tur a ni tlangpui - a thu hriat te chu. Kan awm loh lai hian engtin tak kan chanchin sawi thrin ang maw!
A dawr ve lah hi! Media mi hrang hrang thrianah a siam jeih jeih a, kuhva pahnih-khat a khilai hnuah an media (TV, Chanchinbu) ah a thlawnin, a thlawn liau liauvin 'FAKNA' an tihsak leh nge nge thrin. A tihsaktute a lawm hlei hleiah an la trang lehnghal. Duh duh hunah kan U Thrazuala (Bematuale) pawh hi a zaitir thei niin ka hria.
A sumdawng hi tluang tehchiam lo se ka ti. Infiamna bungraw threnkhatah 'Authorised dealer' ngat niin a inchhâl ve a, kan han hrechiang a, 'authorised dealer a nihna te chu : Prakash Shotputs; Choudhury & Choudhury Carrom dices; Badal Brothers - deals in original kabaddi appliances; tih vel a ni.
Football te hi hre ber niawm tak hian a sawi zuah zuah a, a ning tan chuan a ninawm hle ta ve ang. Hei hi proof ka nei thlap. A dawr chêp tak nghaktu Apuia'n heti hian a sawi tlat : "Chhûnah nilengin dawrah a thru hnûr a, zanah TV han en ila, inkhel chanchin a lo sawi a, a lo thru leh hnûr a, ka en ning teh ania" a ti. Thil ni thei a ni.
KA TUI DAWN TLAT! Article la ziah hial tur a ni.
Marin, Mamuana nupui i ni ta chu aniah! Ka khawngaih em mai che. Zantin kuhva nawi i kiss dawn chu a ni ta sia!

2008-10-22T13:29:00.001+05:30

Hla hre sual

2008-10-14T15:49:00.002+05:30

Hla hriat sual :
* Daduhi - "Mahse suihlunglen zual chang ni hian, sakhmel CONDI awm lo, kar a hla"
* KHB - "Ringliani hnungah, Ringliani hnungah. Kraws chungah nunna tui chu a luang. Ringliani hnungah"
* Guns N Roses - "And because of Vember Rain"
* Belinda - "Ka thiam ka finna zawngte, Lalpa i ta a ni. Hei hi NGHATHU UIH ber, nangmah fak hi"
* Youth Club Zaipawl - "CALCIUM rawh le, ZUNGKAWNG a zau lua e"

Tawia leh A-da-a leh Zaia'n an thawh belh ang

Poetry hi

2008-10-10T14:39:00.004+05:30

Mafaa'n (Vanlalfa-a, to be precise) a 'Thlaler Aurawl' lehkhabuah poetry a dah nual a, ka chhiar ka chhiar a, ngaihnawm ka ti ve riau mai! ka'n phuah ve chhin ngat te'ng. Rhyme thlapin.

AMI TAWNAH
Ami tawnah i ti phut a
Nang ngaiin ka tlu khut a!

Hei chu a mawi lo. A dang

HRUAI CHUAIA
Leng zawng zingah i nawi ber, Lalhruai
Chutin hnam tin tawnah par ang i chuai
Thil tin tiin i at huai
Engah thil holamah i buai
Nawm tumin thil tinreng i ruai
Mahse i ni tho tho si a - tuai
I heh hrep lehnghala Kolasib sahdah RUM nuai
An sawi pasaltha tuarzuau iangin i men piai puai
Hmasawn tum lo i her liai luai

Uang Huang ka tihchhuah

2008-09-04T13:01:00.002+05:30

Fiamthu thra zet zet nia kan ngaih SMS-in kan han thawn a, mi pahnih-khat. A hnu lawkah midang daih hnen atangin kan han dawng leh a, a lawmawm dan a dangdai! Y2Goal Mamuana hnenah han thawn ila, darh chak thei fua fua tak a ni. Phur chang changin 'Mizopa SMS, hun bik nei jokes' la post thrin ila a thra ngawt ang. Peih erawh a har fu ang.

Saruak Hlimthla

2008-08-26T15:07:00.002+05:30

Tunhnaiah saruak thlalak leh eng ila fahran a lar hle mai. Kan nulate u, fimkhur teh u! In khawsa duh a nih paw'n in thu a ni a, thla erawh zawng la tawh lul suh u. A tawpah chuan nangmahni bawk a ni mualpho leh thrin ni. Nupuite kan 'kiss' lai tak ngial pawh thla kan lak ngam loh hi.

Nupui fanau

2008-08-21T15:23:00.002+05:30

Nupui kan han nei ve a, chutah Pathian malsawmna dawngin fapa pekin kan awm a, chutih laia nupui leh fapa bula awm thei lova hmun danga awm a ngai tlat mai hi chu a hreawm ve reuh hle a ni. Sipai ho khawhar thrin tur zia min ngaihtuahchhuahtir thrin. Kei chu kartin ka la haw thei zawk a, sipai ho phei chu ral ramah te emaw an awm a, Kargil lunglen an pe na ve thrin ngawt ang. "Ki ghar kab aoge, likho kab aoge, sms kab aoge......" tia zai vawng vawng tur pawh an lo ni reng a ni

2008-08-21T12:26:00.002+05:30

Skylinks TV-ah 'Uang Huang' programme kan siam a, pachang ve meuh, ka han nui huah huah mai thrin kha a ngaihawm ve fu mai. Tunah kei aia thiam LR-a'n min thlak ta a, keia tih ve ai chuan a 'hit' niin a lang. A lawmawm hle mai.

2008-08-20T17:10:00.000+05:30

Kolasib khawpuia khua a han lum tak tak hi chuan saruak veka kan awm hnuah pawh phelh tur kan la zawng kan la zawng mai a nih hi. 'Marawhchu, khawlum te, khawvawt te pawh hi khaikhin tur hmun dang a awm vang mai maia nuam leh hreawm a lo ni! Kolasib a lum kan tih viau chun lehlangin Bairabi kan zuk kal a, kan han haw leh hi chuan "Kolasib chu a lo zo vah vah hle mai" kan ti ve tho thrin nia!
Chutiang vel mai mai chu a lo ni e, khawvel hi. Mi pakhat, 'thaiboy' intiin ka blog a rawn tlawh ve mial a, lawm tur nge lawm loh tur ka hre lo na a, thin erawh a rim lem love.

2008-08-08T18:04:00.000+05:30

He ka internet thiltih ve hi tlawhtu an awm ve thrin ang tih beiseina avanga siam ka ni lova, ka kuthlei thiltih mai mai zuk nia!