Nupui-pasal then hla

Phuarna hruihrual phelh dulin
Suihna lazai zai chatin
Thlunna lakam valh phelhin
Zalenna hnawksak thlahlelin

Tawng kim generation

Thuhma : He thutawi hi Lunglen Magazine, May 2013 ah chhuah a ni tawh.

1970s-1980s hun chawhma lama piang Mizoram naupang ho khan hun inthlak danglam, a tunlai ṭawng takin ‘Change’ kan hmu hnem bik ngawtin ka hria.

Khawvelah hun inthlak leh inher danglam lian tham tak tak a awm. A khawmualpui leh ram azirin chu’ng hun chu a inanglo thei ang. Europe-a Renaissance leh Industrial Revolution te, Indopui avanga hun inher danglamte, anmahni awptute lak aṭanga zalenna an hmuh avanga ram leh khawtlang nun insiksawite – a tam mai. 

Keini Mizote zingah pawh hun inher danglam pawimawh tak tak a awm nual. A ṭhente chu khawvel virkualina min virpui ve tho avanga kan tawnte a nih laiin a ṭhen erawh chu khawvel hmun dang ami tena min hriatpui tehchiam loh – keimahni ta bil liau liau te pawh an ni ve bawk.

Chu’ng hun hrang hrang tawngtu te zingah chuan 1970 – 1980s chhuak ho hi a tawng kim pawl tak leh tawng pawimawh pawl tak kan ni mai angem aw ka ti deuh a ni. (Pâwl kan din tâk phei chu ka hre hlei lova! Nge ni a, pawl chu a ding daih tawh a, membership fee min khawn ve lo zawk?)

Mizoram politics chanchina pawimawh berte zinga mi ‘Rambuai’ zualpui kha kan hre hman hlawm lo na a, a rual u deuh kha chuan a boruak an tem ve nual hman. Kei takngial pawhin curfew kha chu ka hre ve.

Keini rual ho zingah hian CRP Camp-a atta la dil miahlo kan tam lo maithei e. Kan ûte ho ‘Tea Stall’-a an inhnangfak lai hnukchhuaka, ‘Fast food restaurant’-a hruailuttu te kan ni a, ‘Fried Rice artui chhipchhuan’ hmuchhuaktu kan ni.

Lieutenant Governor leh Governor danglamna hre turin UT sawrkar leh State sawrkar kan hrawn hman ve ve a, Assam Rifle hmuna ‘Laipui kawh hlauhawmzia’ inhrilhchhâwng ṭhinte kha kan ni.

Durtlang khâma ballot box lumte leh EVM kan thliar thiam thlap a, ZORO ‘Aih ka laih saih’ kan hriat bel tluk zetin MNF – MNF(N) – ZNP pawh kan bel ve thawkhat hman.

Keini rual ho kha raw bul chang tiangkawm leh a thei deuh fa tena sawrkar tiangkawm nena hockey khel ṭhin ve tho kha kan ni a, kan ûte ho ruala Gabriela Sabatini lo ralkhat ‘tawihtu’ leh kan naute ho kianga Anna Ivanovic lo ‘Like-tu’ kan ni ve tho tlat.

Kan naupan lai khan (‘Ti ve khanglang ila’ ka ti dawn lova; kan naupan lai a ni miauva), khawpui leh thingtlang kha tun ang em em hian a la inthlau lo niin ka hria. Khawpui naupang leh thingtlang naupang khan – tuihâwk kan khuap a, lui kan kal a, sairawkherh nen sava kan veh a, thangchep kan kam a, Masi ruai ṭhehna tur hnah kan la a, pawl bûk kan sa a, kan in-bai-lem-chhuan ṭhin (Chi ka thawh ve fo). Dan naranin khawpui leh thingtlang naupang khan ‘Chatuan Sweet’ kan ngaina deuh fur a, Thangkura leh Hamlet kan ngaithla ṭhin bawk. 

Khawpui emaw thingtlang emaw, keini rual ho kha tuikhura tui chawi ṭhin, public point ami khai ṭhin, mahni ina tui connection lakna tura PWD lamlian laichat tawh kan ni fur awm e. TV antenna leh booster herh tawh ṭhin; cable TV signal drop a taka tawngtu kha kan ni hman tlat. 

Thimhlimah kan pawnto deuh ziah a, kan sikul-a lut ve hmeichhe naupang ho zingah lah khan inkawibah thiamlo ka hre mang hauhlo. Thingtlang naupang ai chuan khawpui naupang khan motor-a behna tur kan hmu zing deuh bik thung.

Hengte hi kan ûte ho paw’n an ti ve vek a, kan naute ho erawh chuan hriatloh an nei nual ang. 

Cinema Hall kan bel hle a, Zodin blacker pakhat phei chu a hmel ka la mitthla thei. TV rawn lut kan en a, kan hmuhlai ngeiin a ni, kan ûte, kan pa te’n an herh rik ṭawk ṭawk ṭhin ni. 

Ṭhianzahoin thawhkhawma ‘Vedio’ cassette hawh ṭhintute kan ni ve a, ‘Ka nu, khawnge i awm?’ tihte, ‘Heroin zuar chu an thi tur a ni’ tih Mizo filmte pawh kan ṭahpui ve hliam hliam hnuah Korean film kan kurpui ve leh tho bawk a.

Hengte hi kan ûte ho paw’n an ti ve vek a, kan naute ho erawh chuan hriatloh an nei nual ang. 

Laldenga Cup, Nipenga leh K.Lala buaipui ṭhinte kha English Premier League leh UEFA Champions League atchilhtu kan ni leh a, Zodi leh Vulmawi aṭanga Tornado, Terminal leh Tribal Power; ‘Khawpui Lammuala Zorock concert’ leh ‘Zika Music Video’ tleipuitute kan ni ve leh zel tho mai.

Chanmari kawn aṭanga Tlangnuama St. Paul’s High School-a ke-a kal ṭhinte khan Town Bus-ah, ‘A haih – haih’, ‘Asangi’, ‘Bezalel’ tih angreng inziakah kan pakai a, City Bus te, Bazar Bus te, Sumo ten kan vanglaiin min nangching hman. Khaw ṭhenkhata autorickshaw khalh hmasa pawl pawh kan rualpui tho.

Kan ute ho chuan ‘P.U.’ aṭangin college an rap a, kan rualpui ho zingah erawh chuan ‘P.U.’ zir hman leh ‘Higher Secondary School’ rap hman kan inkalthelh nuai mai. Comprehensive School-a kai hman pawh kan awm nual ang a, NEHU- Aizawl Campus leh MZU dai pawlh nawk nawktute kha kan ni.

Chhimtuipui District kan hriat bel hle hnuah Saiha District-in min tibahlah chuang lova, Tuirial Airfield leh Lengpui Airport aṭanga zin tawhte kan ni ve tho.

Sawi tur a tam na a, he kan Lunglen chanchinbu ‘Letter to editor’ ah erawh chuan ‘Justin Bieber poster plsss; Adele chanchin plizzz….’ tih bak a awm leh chuang si lovang… Nghe Nghe Nghe…

(Kolasib, April 2013)

K'u Chuauhnuna tan

Tlangval fel tawh tak, fel mah mah tawh, sorkarah pawha Deputy Director hial a nih hnua March 8, 2013-a nupui nei ve tur, amah K'u Chuauhnuna pualin ....
....

Khuanu zarah kan dam anga kan la thi ve chek ang! Chumi hun a lo thlen chuan ka ruang an lumen zanah kan ṭhenawmte bathlarah Hmingsanga te, Darrokima te, Mamuana te, Chuauhnuna te an ṭhukhawm anga, fiamthu an thawh ang a, zahmawh te pawh an sawiin ka ring. Chutiang mi, ka ruang pawh zahpah lo leh ka chhungte mitmei pawh ven tum hauhlo tur tih ka hriatchiansa te nupui-pasal neihni (Ni e. Nupui-PASAL neihni) ah chuan engvanginnge ka kal ang?

Hun ṭha a la rawn inher chhuak zel anga, nupa te pawh an la inchaltauh ve bap bap ṭhin ang chu. Chu’ng hun a lo thlenah chuan an ṭhenawmte bathlar aṭangin Hmingsanga te, Darrokima te, Mamuana te nen kan ralthlir anga, a ṭul a nih chuan zahmawh te pawh kan sawi ve a ni ang chu.

‘Chuauhnuna’n nupui neih a tum’ tih ka hriat khan engtin mah ka awm vak paw’n ka hre lo. Telephone-in ama’n min rawn hrilh a, ‘E! E! A nih tak chu a. Khawia mi? Engtikah? E! E’ tih ringawtin ka chhangin ka hria. Ka awphawi aṭang khan ka be ning deuh tih kha a hrethiam em ka hre lova. Kan inbiak zawha phone ka hmeh hlum rual khan angry birds game ka khelh chhunzawm leh nghal a ni.

Senior Grade MCS officer ni tur hian a lo berah Junior Grade-ah kum 5 aia tlem lo awm phawt a ngai. Tlangval tan Senior Grade MCS Officer a nih theih loh. Kan hriatthiam tlan theih dan turah chuan tuna mi, hemi Chuauhnuna hi Human Rights Activist chu nise ‘Ruatfela Nu Aunty’ vel a ni vah tawh ang. Arte pawh chhan nei lovin a thi lo. I lo thlir ang.

Aizawl Venglai-ah hian ‘Upa Pawl Youth Wing’ an siam em? Lo siam ta se, Upa Pawl chanchinbu-ahte ‘Ṭhalaite Huang’ dah ṭalh an tum angem? I lo thlir ang.

Nula rimna velah intihre fahrana ‘Khawvela puanṭhui rang ber chu Taylor Swift’ titu kha Chuauhnuna hi lo ni reng em? Nge ni a, Fake Account?

E. Lungdar-ah BDO a nih laiin ‘Nulate enthlak, tlangvalte entawn’ niin ama’n a insawi. An entawna ber khan a zir lo nge kan hre lova, pass an awm mang lo.

Kolasib-ah ADC a nih zawk chhungin ADC ve tho Pu Khamluaia kha a thawk-a-phitah ‘Please come, Pu Kham’ tih a ching a, beng a ti kham ṭhin hle.

Ngopa-ah SDO (C) a nih lai leh Manipur-a Naga pawl hrang hrangtena kawngpui an danchah avanga Ngopa lama supply an thiarluh hun kha a innang hlauh. Meitei truck driver 10 chuang a hmelhriat hman a, ‘Imphal-ah chuan ka tlang ve viau asin’ tiin a insawitheih phah viau tih hriat a ni.

Thingsulthliah BDO a ‘zuk’ ni leh a, mi ṭhenkhat anga ‘DBO – Development Blocking Officer’ tia sawi chi a ni ve lo. A bialchhunga ni 100 inhlawhna Job Card-a nula thlalak inbelte kha a taka an hmel a hmuhin an Job Card number-in a ko chat chat thei.

An inneihni chu- kal ve duh viau mah ila. Ka kal lo zawk mai teh ang. Lu meh laklawh lai ka nei tlat.

NUNPHUNG MÂWLLO LEH AWMDAN MAWI I ZIR ANG U...

1. Parawl tan : Chawei dawnah “Chaw ei tawh ang u hmiang” tia au lung lung a ṭul lem lo.

2. Sumo driver, thlawhtheihna-a chuang tan : Khaw dai thlawh thlen veleh “Ṭawngṭaina hmang thei kan awm em?” tih loh tur a ni a, “Zunram thiar duh kan awm chuan inthlahrun hauh loh tur a nia” tih pawh a ngai lêm lo.

3. Restaurant-a i chawlhin : Lassi no khat chauh ina, toothpick-a ha kher ve kher loh tur a ni.

4. Thlan laihna-ah inti bengvar leh inti tlawmngai taka JCB thawhchhuah pui loh nise a ṭha.

5. Sam zuah buk deuhte hi “I chung a va pik ve” tih loh nise.

6. Chhip sam tla kawlhte hi “I va chhipchhuan thawrawng si ve” pawh tih loh nise.

7. Mikhual tan :
     a) Thlen inte toilet luh dawnin inti polite taka kawngka kik kher loh tur.
     b) Dailuah chauh an hmehpui che a nih pawhin inlak Korean nan Chop Stick dil kher loh tur
     c) An tui hâwpna bowl-in iskût chhum hân hâwp loh tur.
     d) Chaw ei laklawh lai leh an sangha dila tui chen laklawh laiin kut tin hleh loh tur
     e) I thlenin pa hming ‘David L. Fanai’ a nih vang mai khan an choka i luh apiangin “Hei hi  maw in David’s Kitchen chu?” ti fo fahran lo la.

8. Khaw kar kawng ‘Hotel’-a i chawlhin i bula miin chi a lam a nih chuan i duh leh hmarcha te chu i pe tel thei tho mai. Mahse an Naga hmarcha thak zet ang chite kha i hmarcha pekah khan phul ru kher lo la.

9. Awmpui tharlam tan : Freezer chhungah tuboh dah suh. A khal sa.

10. Mi chaweia i sawm a nih chuan zinbo daih loh tur.

11. Fu her khâwl subsidy i hmu hlauh a nih chuan a lawmna kurtai ruai siam ang che.

12. Nobel Prize dawng tura i kal a nih chuan thawmhnaw fai inbel ang che. Duhthusamah chuan Chawlhni Kawr hak ngei a fuh.

13. Khualzin phur thlawhtheihna khalh ṭhin i nih chuan vansangah thlawhtheihna dang ‘in race puiah’ cho ngai suh. Mihring kan inang lova, hetiang hlau tlat chi hi awm theih a ni.

Kan Nauva Phai Awm

Kan nauva phai awm

Kan nauva chu phaia awm tih takah a changkâng hle mai.

Mizorama mobile phone a chhuah hma deuh hlek khan phaia a awm laiin mobile phone a nei hman a, Mizorama a rawn haw châng te khan puipunna ilo fahranah a lekchhuak fo fahran a, mobile service a la awm ve tawp si lova.

Mizoram House-ah a tei lût âwl lo nia. “Kei chu hei, phaiah ka awm mek e. Nang hi chuan thlawhtheihna i hmuh vawikhatna a ni ang maw?” tih melhin mikhual zawng zawng a’n melh ngawtah. Rêla chuang nia a hriatte phei chu a melh pawh a melh peih lo law law. Inngaitlawm chapo âr chungin ‘Rêl a la hmuh hauhloh thu’ te a hrilh vel.

House bathlar vela mikhual, mâwl hmel deuh nia a hriatte bulah a titi zuah zuah a. Inti hre fahranin ring zet zetin Cinema Hall leh shopping mall chi hrang hrang hming a sawi zut zut nia. An zâwt tawp silova. Khaini a la hmuam sak zui. Jalpaiguri thlang lama khaini lei tur vânzia te chu a hrechiang ber a nih tehrêng nen.

Neih nei silo, nghei nei thei bawk silo tih takah damlohna thil avanga phai pan, thingtlang pa harsa ve tak takte lehzel pawh zû zuk han in khilai tir fo fahran a. A knowledge a zau nek - Dry Day-ah pawh lakna tur a hria. Khilai lotu tur tih a hriatchian, an vêng mi awm ve te kha chu rilru leh tihtakzetin a hrelo der tluan ṭhak peih. An changkânglo e mai, phaiah pawh awm ve hleilo.

House-a thleng rau rauvah ‘Dorm’-a thlengte chu a aia mâwl leh retheiah a ngai ve hrim hrim. Tuma’n chutiang ngaihdan nei tur chuan an tur sek pawh a ni hranpa law. Chu’ng mite lakah chuan ‘Phaia awmte awmdan tur’ nia a hriat zawng zawng lantir ngei tumin ṭhahnem a ngai thei hle. Ṭawng a sehchilh deuh niai tur a ni a, ke pên dante, cigarette ṭan dan thlengin ‘phaia awmte tihdan bik’ a awm. Dorm-a thlengte hair gel inchhawpte chu a’n ner khum vel khanglang lehnghal ah. VIP room-a thlengte zingah laina leh hmelhriat pakhatmah a nei pawh a ni zeng law.

College lâr lo ve angreng taka a kalnaa a hnamdang ṭhian tuemaw phone-in a be velah. Sapṭawngin. Biak ṭulna pakhatmah a neih hriat a ni lo. Kum 3 lai Kolkata a awm hnuah Bengali ṭawng erawh a thiam hlei lova. “Khawi maw MC Rum ûm chanve” tih chiah zuk sawi thiam a. Hindi phei chu KAHA!

A awmzia hre hawt si lo khan Che Guevara lem chuanna T-Shirt lah chu a ha chhuak ve sek ṭhin. “He nau hi chu a hmêl en ai hian a ril a ni” kan ti ni tlatin a inhria a ni chêk ang. Kurta-Pyjama set hnih a nei bawk.

Damlo thisen pêk ngai an awm tlat mai. Welfare hruaitute kârah buai hmêl zetin a lo tei fua fua a, chik taka amah lo thlithlaitute chuan enge a lo tih ve chiah an hre lo. Pawimawh hmel zet zetin ring deuh deuhvin phone-ah a ṭawng vel a, amah hrechiang lêm lo, phone-a a ṭawng chauh hre tan chuan thil engkim kha a huaihawt leh buaipui vek nia ngaih theih a ni. Mitthi an awm pawhin chuti bawk. Chhawrnahawm hauh silo, ṭangkai hmel zeta a awm thiam si dante hi research tihna tham a tling.

Eizawn nan’a hman tlak hauh siloh talent eng engemaw a nei ve vei diah lehnghal. Hollow Guitar-in ‘Soldier of Fortune’ a perh thiam a, zirlai pawl intihhlim nikhua paw’n zahpuiawm lutuk lovin a zai ve thei mai zel. Magic pawh minute 5 daih vel a show thiam. Programme zawha bungraw senghawi hunah erawh chhuanlam ṭha zet vangin a tel hman lo chiah chiah zel. ‘Chhuanlam bu’ ṭha deuh a neih ngei rin a ni.

Mizo welfare chanchinbu enkawl turin a insawilut thei tlat. Thla khat chhung chu kartin ngaihnawm zet zetin a tichhuak a, a thla leh aṭang erawh chuan a chhuanlam bu a keu leh dun dun.  Thawhthut ṭhahnemngaihna lam hi a ṭhat vena tak a ni awm e.

A khabe veilama khuavang chhinchhiah a neihte hi a phai awm nena kaikawp kual velin zuk han chapopui vel peih a!

Facebook-a Mizote tel tamna group zawng zawngah a tel ve vek a, mi thil sawi leh ziah zawng zawngah ngaihdan a thawh peih ziah lehnghal. Phaia awm zawng zawngte aiawha ngaihdan puangchhuaktu nia inhriatna lian tak a nei. Engkima engkimah ‘Phaia Mizo awmte perspective’ a lo thlawh chhuak ve hman ziah. Zu khap chungchang te, Assam – Mizoram ramri chungchangte, YMA inrelbawlna chungchangahte ‘phaia Mizo awmte ngaihdan’  a rawn phuhchhuak ve ziah hi chu a la hriatthiam theih mai. Kal pawh a la kal hauh lohna, chhungkhat laina takngial pawh an neihlohna thingtlang khaw pakhata VC ten in hmun pass an pek dan chungchangah te lehzela a’n inti fing kim vek mai hi chu LIKE a har ve angreng. Tu ruat mah ni si lo hian kawng tinrengah thurâwn petu ni tlat hian a inhria a ni ang.

Ram hi a han vei laileng khawpah. Ram hmasawn nan’a tihtur ṭul pawh a hre hnem narawh. A ngaihdan nilo, ngaihdan dang hi khawvelah a awm theilo hrim hrim.

A chawlh hmang rawn haw ve te lah hi!  Full-time in a inla changkâng peih. A titi karlakah sapṭawng a zep sek hi chu mênah a thlâk theih mai a, mitthi lumennaa ring zet zet a “KFC lo chu ka ei peih lo. Ka pum hian sub-standard food a digest thei hlawl lo” a ti khanglang ṭhin hi chu aw! Âr sawhchiar a hrelo der zankhua ṭhak peih a, a awmlo a ni tih hrereng chungin Aizawl khawpuiah ‘PVR Cinemas’ te, ‘Pantaloons’ te zuk han zawng buai peih a.  ‘Nungchang ṭha han zirtir deuh chawrh chawrh’ hi ka duh rum rum ṭhin.

Khawhar in riah te chu khawiah khawiah! Phaiah khawhar in an riak ngailo. Sâpho pawh an riak ngailo. Changkânglo lutuk! Ṭhing ṭha ṭhang ṭhang lutuk! “Khawhar in riah – you know; I ain’t gonna do” a ni tawp mai.

Hmuhnawm ti tak tak hauh si lo hian cricket te hi hmuhnawm tih hmel zetin a en reng peih nia. Kar tluan maia Test Cricket en nih te hi phaia awmte awmdan tur diktak niah a ngai. Inleng awmlai phei chuan a en reng mai a ni.

A hrethiamlo a ni tih hretu kan awm reng chung pawha Hindi talk show a ena, an ngaihdan a ṭawmpui ve niawm taka a lû a bu der nghut nghut peih reng mai te hi a taimak thlak ngawt mai. Taihmak nazawng hi dinchhuahna a lo ni kher lo a nih hi.

Lehkha zir tura phai awm a ni tih chu kan hriat dan a ni a, kum khat chhung leka a zuk awmna phairam khaw lian em em mai lehnghal a zuk hre bel lutuk erawh hi chu ṭangkai hun awm bawk mahse, a ngaihṭhatthlak loh. A hmun hriatchian leh bel em em hovah hian lehkhabu dawr a vâng em em mai nia.

Lehkhabu hrim hrim chu a nei ngah ve angreng. Ṭumkhat a rawn haw pawhin lehkhabu KG 40 chuang zet a rawn hawn a, Crime & Detective magazine hlir.

Phaiah chuan eng ber nge a zuk zira a zuk tih kan hre lova, a chhungte paw’n an hre chiang vak lo. A châng leh MBA zir angin a insawi a, “Call Centre-ah ka thawk” a ti thûl. Sumdâwng veivâk te hi nileng lengin a zui kual hman a, tlêma mâwl hmel deuh nia a hriatte bulah chuan ‘Prakash Shotput Company’ ah nihna pawimawh tak chelh mêk ang tein a insawi tih hriat a ni. A hawiher en chuan kung fu pawh tlem azawng chu a zir ve tawh ṭhin a nih kan ring.  A nau, tlêma tlem deuh pakhat chuan ‘Bahadur Technical Academy of Commerce for Arts’ ah ‘Applied Psychiatry Department’ ah a awm niin a sawi a, amah hi student nilovin practical tih nan an hmang ṭhin zawk a nih kan ring deuh.

‘Ka ṭhianpa’ a tih ve ziah lah kha. Mipa zingah rau rau pawh pâ hrêk hrâwk a ni ngailo tih chu kan hria. ‘Marawhchu, hetia a hminga phaia a han awm sil tâk hnu hian a bu ang thlapin a rawn pherh haw a, a la intithei zawmah nia. A bari ṭhen buai nuaih khawpa saihlum hrual taka hrual duh awm se tih châng ka nei.  Tum rêng vanga pherh chu an ngeiawm bik zâw zâw riau. ‘It’s my life’ tih nachâng te chu a hre vei nek a. ‘Define life in the context of Darwin’s philosophy’ han ti ila, sawi tur hre mang si lovin a thlan a tla leh bat bat lawi si.

Shakespeare-a khan a thu leh hla ho kha a phuahchawp mai mai a lo ni âwm e. Kan inang hle mai. Kei pawh ka thu ziah hi ka phuahchawp mai mai a nih hi. Shakespeare-a nena kan inanlohna erawh pakhat a awm. Kan nauva phai awm chungchanga keia phuahchawp thuziah ve hi chuan eng zirlaibu mah a thlen hmêl loh.

Kolasib

12 October, 2012