K'u Chuauhnuna tan

Tlangval fel tawh tak, fel mah mah tawh, sorkarah pawha Deputy Director hial a nih hnua March 8, 2013-a nupui nei ve tur, amah K'u Chuauhnuna pualin ....
....

Khuanu zarah kan dam anga kan la thi ve chek ang! Chumi hun a lo thlen chuan ka ruang an lumen zanah kan ṭhenawmte bathlarah Hmingsanga te, Darrokima te, Mamuana te, Chuauhnuna te an ṭhukhawm anga, fiamthu an thawh ang a, zahmawh te pawh an sawiin ka ring. Chutiang mi, ka ruang pawh zahpah lo leh ka chhungte mitmei pawh ven tum hauhlo tur tih ka hriatchiansa te nupui-pasal neihni (Ni e. Nupui-PASAL neihni) ah chuan engvanginnge ka kal ang?

Hun ṭha a la rawn inher chhuak zel anga, nupa te pawh an la inchaltauh ve bap bap ṭhin ang chu. Chu’ng hun a lo thlenah chuan an ṭhenawmte bathlar aṭangin Hmingsanga te, Darrokima te, Mamuana te nen kan ralthlir anga, a ṭul a nih chuan zahmawh te pawh kan sawi ve a ni ang chu.

‘Chuauhnuna’n nupui neih a tum’ tih ka hriat khan engtin mah ka awm vak paw’n ka hre lo. Telephone-in ama’n min rawn hrilh a, ‘E! E! A nih tak chu a. Khawia mi? Engtikah? E! E’ tih ringawtin ka chhangin ka hria. Ka awphawi aṭang khan ka be ning deuh tih kha a hrethiam em ka hre lova. Kan inbiak zawha phone ka hmeh hlum rual khan angry birds game ka khelh chhunzawm leh nghal a ni.

Senior Grade MCS officer ni tur hian a lo berah Junior Grade-ah kum 5 aia tlem lo awm phawt a ngai. Tlangval tan Senior Grade MCS Officer a nih theih loh. Kan hriatthiam tlan theih dan turah chuan tuna mi, hemi Chuauhnuna hi Human Rights Activist chu nise ‘Ruatfela Nu Aunty’ vel a ni vah tawh ang. Arte pawh chhan nei lovin a thi lo. I lo thlir ang.

Aizawl Venglai-ah hian ‘Upa Pawl Youth Wing’ an siam em? Lo siam ta se, Upa Pawl chanchinbu-ahte ‘Ṭhalaite Huang’ dah ṭalh an tum angem? I lo thlir ang.

Nula rimna velah intihre fahrana ‘Khawvela puanṭhui rang ber chu Taylor Swift’ titu kha Chuauhnuna hi lo ni reng em? Nge ni a, Fake Account?

E. Lungdar-ah BDO a nih laiin ‘Nulate enthlak, tlangvalte entawn’ niin ama’n a insawi. An entawna ber khan a zir lo nge kan hre lova, pass an awm mang lo.

Kolasib-ah ADC a nih zawk chhungin ADC ve tho Pu Khamluaia kha a thawk-a-phitah ‘Please come, Pu Kham’ tih a ching a, beng a ti kham ṭhin hle.

Ngopa-ah SDO (C) a nih lai leh Manipur-a Naga pawl hrang hrangtena kawngpui an danchah avanga Ngopa lama supply an thiarluh hun kha a innang hlauh. Meitei truck driver 10 chuang a hmelhriat hman a, ‘Imphal-ah chuan ka tlang ve viau asin’ tiin a insawitheih phah viau tih hriat a ni.

Thingsulthliah BDO a ‘zuk’ ni leh a, mi ṭhenkhat anga ‘DBO – Development Blocking Officer’ tia sawi chi a ni ve lo. A bialchhunga ni 100 inhlawhna Job Card-a nula thlalak inbelte kha a taka an hmel a hmuhin an Job Card number-in a ko chat chat thei.

An inneihni chu- kal ve duh viau mah ila. Ka kal lo zawk mai teh ang. Lu meh laklawh lai ka nei tlat.

NUNPHUNG MÂWLLO LEH AWMDAN MAWI I ZIR ANG U...

1. Parawl tan : Chawei dawnah “Chaw ei tawh ang u hmiang” tia au lung lung a ṭul lem lo.

2. Sumo driver, thlawhtheihna-a chuang tan : Khaw dai thlawh thlen veleh “Ṭawngṭaina hmang thei kan awm em?” tih loh tur a ni a, “Zunram thiar duh kan awm chuan inthlahrun hauh loh tur a nia” tih pawh a ngai lêm lo.

3. Restaurant-a i chawlhin : Lassi no khat chauh ina, toothpick-a ha kher ve kher loh tur a ni.

4. Thlan laihna-ah inti bengvar leh inti tlawmngai taka JCB thawhchhuah pui loh nise a ṭha.

5. Sam zuah buk deuhte hi “I chung a va pik ve” tih loh nise.

6. Chhip sam tla kawlhte hi “I va chhipchhuan thawrawng si ve” pawh tih loh nise.

7. Mikhual tan :
     a) Thlen inte toilet luh dawnin inti polite taka kawngka kik kher loh tur.
     b) Dailuah chauh an hmehpui che a nih pawhin inlak Korean nan Chop Stick dil kher loh tur
     c) An tui hâwpna bowl-in iskût chhum hân hâwp loh tur.
     d) Chaw ei laklawh lai leh an sangha dila tui chen laklawh laiin kut tin hleh loh tur
     e) I thlenin pa hming ‘David L. Fanai’ a nih vang mai khan an choka i luh apiangin “Hei hi  maw in David’s Kitchen chu?” ti fo fahran lo la.

8. Khaw kar kawng ‘Hotel’-a i chawlhin i bula miin chi a lam a nih chuan i duh leh hmarcha te chu i pe tel thei tho mai. Mahse an Naga hmarcha thak zet ang chite kha i hmarcha pekah khan phul ru kher lo la.

9. Awmpui tharlam tan : Freezer chhungah tuboh dah suh. A khal sa.

10. Mi chaweia i sawm a nih chuan zinbo daih loh tur.

11. Fu her khâwl subsidy i hmu hlauh a nih chuan a lawmna kurtai ruai siam ang che.

12. Nobel Prize dawng tura i kal a nih chuan thawmhnaw fai inbel ang che. Duhthusamah chuan Chawlhni Kawr hak ngei a fuh.

13. Khualzin phur thlawhtheihna khalh ṭhin i nih chuan vansangah thlawhtheihna dang ‘in race puiah’ cho ngai suh. Mihring kan inang lova, hetiang hlau tlat chi hi awm theih a ni.

Kan Nauva Phai Awm

Kan nauva phai awm

Kan nauva chu phaia awm tih takah a changkâng hle mai.

Mizorama mobile phone a chhuah hma deuh hlek khan phaia a awm laiin mobile phone a nei hman a, Mizorama a rawn haw châng te khan puipunna ilo fahranah a lekchhuak fo fahran a, mobile service a la awm ve tawp si lova.

Mizoram House-ah a tei lût âwl lo nia. “Kei chu hei, phaiah ka awm mek e. Nang hi chuan thlawhtheihna i hmuh vawikhatna a ni ang maw?” tih melhin mikhual zawng zawng a’n melh ngawtah. Rêla chuang nia a hriatte phei chu a melh pawh a melh peih lo law law. Inngaitlawm chapo âr chungin ‘Rêl a la hmuh hauhloh thu’ te a hrilh vel.

House bathlar vela mikhual, mâwl hmel deuh nia a hriatte bulah a titi zuah zuah a. Inti hre fahranin ring zet zetin Cinema Hall leh shopping mall chi hrang hrang hming a sawi zut zut nia. An zâwt tawp silova. Khaini a la hmuam sak zui. Jalpaiguri thlang lama khaini lei tur vânzia te chu a hrechiang ber a nih tehrêng nen.

Neih nei silo, nghei nei thei bawk silo tih takah damlohna thil avanga phai pan, thingtlang pa harsa ve tak takte lehzel pawh zû zuk han in khilai tir fo fahran a. A knowledge a zau nek - Dry Day-ah pawh lakna tur a hria. Khilai lotu tur tih a hriatchian, an vêng mi awm ve te kha chu rilru leh tihtakzetin a hrelo der tluan ṭhak peih. An changkânglo e mai, phaiah pawh awm ve hleilo.

House-a thleng rau rauvah ‘Dorm’-a thlengte chu a aia mâwl leh retheiah a ngai ve hrim hrim. Tuma’n chutiang ngaihdan nei tur chuan an tur sek pawh a ni hranpa law. Chu’ng mite lakah chuan ‘Phaia awmte awmdan tur’ nia a hriat zawng zawng lantir ngei tumin ṭhahnem a ngai thei hle. Ṭawng a sehchilh deuh niai tur a ni a, ke pên dante, cigarette ṭan dan thlengin ‘phaia awmte tihdan bik’ a awm. Dorm-a thlengte hair gel inchhawpte chu a’n ner khum vel khanglang lehnghal ah. VIP room-a thlengte zingah laina leh hmelhriat pakhatmah a nei pawh a ni zeng law.

College lâr lo ve angreng taka a kalnaa a hnamdang ṭhian tuemaw phone-in a be velah. Sapṭawngin. Biak ṭulna pakhatmah a neih hriat a ni lo. Kum 3 lai Kolkata a awm hnuah Bengali ṭawng erawh a thiam hlei lova. “Khawi maw MC Rum ûm chanve” tih chiah zuk sawi thiam a. Hindi phei chu KAHA!

A awmzia hre hawt si lo khan Che Guevara lem chuanna T-Shirt lah chu a ha chhuak ve sek ṭhin. “He nau hi chu a hmêl en ai hian a ril a ni” kan ti ni tlatin a inhria a ni chêk ang. Kurta-Pyjama set hnih a nei bawk.

Damlo thisen pêk ngai an awm tlat mai. Welfare hruaitute kârah buai hmêl zetin a lo tei fua fua a, chik taka amah lo thlithlaitute chuan enge a lo tih ve chiah an hre lo. Pawimawh hmel zet zetin ring deuh deuhvin phone-ah a ṭawng vel a, amah hrechiang lêm lo, phone-a a ṭawng chauh hre tan chuan thil engkim kha a huaihawt leh buaipui vek nia ngaih theih a ni. Mitthi an awm pawhin chuti bawk. Chhawrnahawm hauh silo, ṭangkai hmel zeta a awm thiam si dante hi research tihna tham a tling.

Eizawn nan’a hman tlak hauh siloh talent eng engemaw a nei ve vei diah lehnghal. Hollow Guitar-in ‘Soldier of Fortune’ a perh thiam a, zirlai pawl intihhlim nikhua paw’n zahpuiawm lutuk lovin a zai ve thei mai zel. Magic pawh minute 5 daih vel a show thiam. Programme zawha bungraw senghawi hunah erawh chhuanlam ṭha zet vangin a tel hman lo chiah chiah zel. ‘Chhuanlam bu’ ṭha deuh a neih ngei rin a ni.

Mizo welfare chanchinbu enkawl turin a insawilut thei tlat. Thla khat chhung chu kartin ngaihnawm zet zetin a tichhuak a, a thla leh aṭang erawh chuan a chhuanlam bu a keu leh dun dun.  Thawhthut ṭhahnemngaihna lam hi a ṭhat vena tak a ni awm e.

A khabe veilama khuavang chhinchhiah a neihte hi a phai awm nena kaikawp kual velin zuk han chapopui vel peih a!

Facebook-a Mizote tel tamna group zawng zawngah a tel ve vek a, mi thil sawi leh ziah zawng zawngah ngaihdan a thawh peih ziah lehnghal. Phaia awm zawng zawngte aiawha ngaihdan puangchhuaktu nia inhriatna lian tak a nei. Engkima engkimah ‘Phaia Mizo awmte perspective’ a lo thlawh chhuak ve hman ziah. Zu khap chungchang te, Assam – Mizoram ramri chungchangte, YMA inrelbawlna chungchangahte ‘phaia Mizo awmte ngaihdan’  a rawn phuhchhuak ve ziah hi chu a la hriatthiam theih mai. Kal pawh a la kal hauh lohna, chhungkhat laina takngial pawh an neihlohna thingtlang khaw pakhata VC ten in hmun pass an pek dan chungchangah te lehzela a’n inti fing kim vek mai hi chu LIKE a har ve angreng. Tu ruat mah ni si lo hian kawng tinrengah thurâwn petu ni tlat hian a inhria a ni ang.

Ram hi a han vei laileng khawpah. Ram hmasawn nan’a tihtur ṭul pawh a hre hnem narawh. A ngaihdan nilo, ngaihdan dang hi khawvelah a awm theilo hrim hrim.

A chawlh hmang rawn haw ve te lah hi!  Full-time in a inla changkâng peih. A titi karlakah sapṭawng a zep sek hi chu mênah a thlâk theih mai a, mitthi lumennaa ring zet zet a “KFC lo chu ka ei peih lo. Ka pum hian sub-standard food a digest thei hlawl lo” a ti khanglang ṭhin hi chu aw! Âr sawhchiar a hrelo der zankhua ṭhak peih a, a awmlo a ni tih hrereng chungin Aizawl khawpuiah ‘PVR Cinemas’ te, ‘Pantaloons’ te zuk han zawng buai peih a.  ‘Nungchang ṭha han zirtir deuh chawrh chawrh’ hi ka duh rum rum ṭhin.

Khawhar in riah te chu khawiah khawiah! Phaiah khawhar in an riak ngailo. Sâpho pawh an riak ngailo. Changkânglo lutuk! Ṭhing ṭha ṭhang ṭhang lutuk! “Khawhar in riah – you know; I ain’t gonna do” a ni tawp mai.

Hmuhnawm ti tak tak hauh si lo hian cricket te hi hmuhnawm tih hmel zetin a en reng peih nia. Kar tluan maia Test Cricket en nih te hi phaia awmte awmdan tur diktak niah a ngai. Inleng awmlai phei chuan a en reng mai a ni.

A hrethiamlo a ni tih hretu kan awm reng chung pawha Hindi talk show a ena, an ngaihdan a ṭawmpui ve niawm taka a lû a bu der nghut nghut peih reng mai te hi a taimak thlak ngawt mai. Taihmak nazawng hi dinchhuahna a lo ni kher lo a nih hi.

Lehkha zir tura phai awm a ni tih chu kan hriat dan a ni a, kum khat chhung leka a zuk awmna phairam khaw lian em em mai lehnghal a zuk hre bel lutuk erawh hi chu ṭangkai hun awm bawk mahse, a ngaihṭhatthlak loh. A hmun hriatchian leh bel em em hovah hian lehkhabu dawr a vâng em em mai nia.

Lehkhabu hrim hrim chu a nei ngah ve angreng. Ṭumkhat a rawn haw pawhin lehkhabu KG 40 chuang zet a rawn hawn a, Crime & Detective magazine hlir.

Phaiah chuan eng ber nge a zuk zira a zuk tih kan hre lova, a chhungte paw’n an hre chiang vak lo. A châng leh MBA zir angin a insawi a, “Call Centre-ah ka thawk” a ti thûl. Sumdâwng veivâk te hi nileng lengin a zui kual hman a, tlêma mâwl hmel deuh nia a hriatte bulah chuan ‘Prakash Shotput Company’ ah nihna pawimawh tak chelh mêk ang tein a insawi tih hriat a ni. A hawiher en chuan kung fu pawh tlem azawng chu a zir ve tawh ṭhin a nih kan ring.  A nau, tlêma tlem deuh pakhat chuan ‘Bahadur Technical Academy of Commerce for Arts’ ah ‘Applied Psychiatry Department’ ah a awm niin a sawi a, amah hi student nilovin practical tih nan an hmang ṭhin zawk a nih kan ring deuh.

‘Ka ṭhianpa’ a tih ve ziah lah kha. Mipa zingah rau rau pawh pâ hrêk hrâwk a ni ngailo tih chu kan hria. ‘Marawhchu, hetia a hminga phaia a han awm sil tâk hnu hian a bu ang thlapin a rawn pherh haw a, a la intithei zawmah nia. A bari ṭhen buai nuaih khawpa saihlum hrual taka hrual duh awm se tih châng ka nei.  Tum rêng vanga pherh chu an ngeiawm bik zâw zâw riau. ‘It’s my life’ tih nachâng te chu a hre vei nek a. ‘Define life in the context of Darwin’s philosophy’ han ti ila, sawi tur hre mang si lovin a thlan a tla leh bat bat lawi si.

Shakespeare-a khan a thu leh hla ho kha a phuahchawp mai mai a lo ni âwm e. Kan inang hle mai. Kei pawh ka thu ziah hi ka phuahchawp mai mai a nih hi. Shakespeare-a nena kan inanlohna erawh pakhat a awm. Kan nauva phai awm chungchanga keia phuahchawp thuziah ve hi chuan eng zirlaibu mah a thlen hmêl loh.

Kolasib

12 October, 2012

A bawplawk

Hman zan chu TV-ah chanchinthar ka en a, ka ngaithla pah bawk a, Central Minister pakhat Mizorama a rawn zin thu a ni nghe nghe. “Minister zahawm tak Pu Englova chuan lehlângin Mizoram a rawn tlawh dawn a, tlaiah a haw leh ang” a ti, a puangtu’n. Hetia ‘Minister zahawm tak’ an awm hran a nih chuan ‘Minister zahawmlo tak’ pawh an awm a nih hmêl! Lehlânga zin te chu tlaia a haw leh loh ten lehlâng a ni nâng!

            A hnu lawkah vairam hmun pakhata mipui leh police te intualvuak thu a rawn puang a, hliam tuarte chu damdawi in hnai ber panpui an nih thu a sawi. Ka ṭhuthmunah ka lo ngaihtuah ve neuh neuh a, damdawi in hnai ber an panpui loh nâkah! A hla ber panpui thu awm hek lo! Mi hliam tuar, a ranglama bawihsawm ngaia an awm laia “Chumi khami damdawi inah kalpui ang. Ka hmelhriat nurse a thawk ve alawm” tih chi a ni dawn emni?

            Chutah TV hnuai scroll, ‘thu bawkvâk kal zet zet’ ah hian fakna a rawn lang a, ‘TV neilote tana dawr pakhatin installment-a an pek theih’ thu. TV neilo na na na, engtinnnge kha fakna kha an hmuh ang ni? “Mobile phone ka nei thar ve a, ka number hre duh chuan min rawn call rawh u” tih ang vel a ni.

            “Hriattirna puan tur kan neih kan han puang ange” an rawn ti puam leh ṭalh ṭalh a, “Aw! In neihloh te chu puan thu a awm hleinem” ka ti rilru a, khawiahmah phei chuan sawichhuah ka tum chuang lo. “Hello, hello! Chumi khami vêng information centre aṭangin. Tukkin zing hian puan tur engmah a awm loh avangin engmah kan rawn puang lovang” tia vantlang aurinna hmanga thu puan ang deuh a ni.

            ‘A mamawh apiangte’ hman tura thisen pek thu pawh ka hre ṭhin. Ni e, a mamawhlo te tana pek ṭâlh thu a awm lêmlo. A mak dawn êm asin – “Nimin khan YMA Branch pakhat chuan a mamawhlo apiangte hman turin thisen Rambo polythene riat an pe!” A châng phei chuan ‘damlo mamawh te tana hman tur thisen pek’ thu pawh! ‘Damlo mamawhtu’ chu medical college te hi an ni deuh ber lawm ni – experiment tih na’n! Psychiatry Department lamte hian min mamawh ngawih ngawih mai ang tihte hi ania ka hlauh ni.

            Fakna hmuhnawm tih deuh deuh ka nei. Vodafone ho ZooZoo fakna ho te hi a ṭha thei ka ti. A sapṭawng takin rhyme leh flow ṭha zet zet leh catchy tak tak a awm ṭhin. ‘Kan North East Kan Star’ ang deuh hian ti ve dawn ta ila, ‘Kan Hnahlan kan Zawlaidi’; ‘Ram pum-ah Rum Pum’ – a va ṭha e!

            Fakna titu ṭhenkhat chuan anmahni dawrtute chu an ina an dahsak theih thu an sawi a, a lawmawm ngawt mai. Amaherawhchu, septic tank paihfai ṭhin an nih chuan ka inah min rawn dahsak lo mahse pawi ka ti lo angreng.

Motor-a tui chawi ṭhin te hian inah min dahsak thei lo ta se a buaithlak hlein ka ring bawk. Veng inhlat deuh nih phei chuan an ina mi kan va chawi ṭâng ṭâng dawn tihna ania!

Chanchinbute hi inah min rawn dahsak lo ta se a buaithlak hle bawkin ka ring. An office-ah kan va kal anga, an computer-a an dah kha kan va inchhiar chhâwk emaw a ni’anga.

            Fakna ṭhenkhat hi chu ha hawlh tak tak a awm vein ka hria. Khawvel huap courier service titu lar tak pakhat pawhin khawvel khawi hmunah pawh bungrua an thawn theih thu an tlangaupui ṭhin. Mahse, New York aṭangin Rastali-ah commode brush pakhat thawn duh ta ila chhuanlam mawihnai tak nena min hnial thlâk ka ring tlat.

            ‘Be a man, just like a man’ fakna pawh hi ngunthlûk taka ngaihtuah hian ka ngaihtuahna a tibuai. 'Be a man' tih hi chu chiang sa rân mai. 'Just Like A Man' tih lai tak hi mipa tling zat lo te sawina a nih duh hmel riauva ka hriat.

            “Kan puanven leh ballboot sawi chhîngin malaria i do ang u” tia sawmna kan dawng fo mai pawh hian min tibuai ṭhin. Puanven chu kan sawi chhing chhên thei e; ‘Ballboot sâwi chhîn’ hi chu a harsa a nih rih hi. Ka thiam thei ngang lo. “Kan thle lek lek kan thlunglu leh kheimit” tih ang deuh ni maia ka hriat.

            India ram huap English News channel te pawh hi ka thlir ve zeuh zeuh ahin a, bahlah an ngah ve tho ṭhin nia. Ṭum khat pawh politician hlun tak pakhat a boral ṭumin news chhiartu leh mitthi in-a an reporter kha live-in an inbia a, news chhiartu chuan “What’s the mood out there?” zuk han ti a! Mitthi inah te eng ‘mood’ nge awm se a tih rêng rêng ni? Reporter khan “Oh, in fact, the mood is very jubilant here…chuti khati” a ti lo hlauhvin ka hria. Lo chîk ve mah teh u; an reporter te hian “In fact” tih hi an sawi zing hlawm tak tak – a bikin live report-ah.

            Hindi ṭawngah chuan mi hming tawpah zahna entirnan ‘ji’ an telh ṭhin a nih hi. Sonia-ji, Laloo-ji, Lalthanhawla-ji etc. Ṭum khat pawh reporter pakhatin Railways Minister a nih laiin Mamata Banerji a interview a, ‘Banerji-ji’ a tih a ṭul ta ṭhin si a, a rik dan chu a nuihzatthlak vei reuh phian. Han ti ve chhin mah teh u. In ṭhenawma Pu Ralzi-a kha Hindi-in han kawm ula, ‘Ralzi-ji’ in ti in ti mai ang. 

Thil Ṭullo te.....

Facebook-ah 'Thil ṭullo te' tiin thu holam ka post a, ka friends ṭhenkhatin min rawn tuipui ta phian mai a, nuam kan ti hlawm vei nek. An phalna ka la hauh lo na a, ti hian publish ve leh hmiah te'ng. Thih leh thih....

Status Update: Vengchhung YMA chanchinbu regular column atana Mumbai local train timing tarlan ve ziah kher a trullo...

(Kei ai ai khan an rawn hre ṭha hlawm leh sia... Hei...)

#  Dingtea Royte :  Himalaya tlanga lawn dawn vanga tribal certificate ken kher a trullo e...

#  Mafac Pachuau : School Annual Magazine a weather forecast telh poh hi......

#  Michael Rinsanga : Naupang Pual Chanchinbu a SEX EDUCATION telh kher pawh hi

#  Stephen Auhmun : Upa Pawl chanchinbu-a 'Kungfu leh kan nun' tih article lo ziah ve chhen a ṭul lem lo

#  Opa Hmar :  College mag.-a Naupang Pual lo telh ve ciam pwh a trul lêm lou!

# Rider Mka Ralte : Sex education lam sawina a, zahmawh sawi hreh pawh hi

#  Rider Mka Ralte:  Condom fakna a, mawza an in buntir pawh hi..

#  Mami Chawngthu : min barakhaih.. K van nui nasa tei m2.

# Abie J Notlia zanlai Au aw chanchinbu a 'Beimatuale' lyrics lo tarlan chhen te pawh hi

#  Eric Zo Renthlei : Zonu a Pacman a te inhnek tur tarlan chiam a tul lem lo

#  Vala Sailo : ReaderDigest a Baibing Rèp lo zawrh vechhen pawhhi

#  Michael Rinsanga : Science Journal a Sailova zin report thai lan ziah pawh hi

# Abie J Notlia : Loneihtute Magazine a 'Chhass rimtluk dan' article zia te hi

# Abie J Notlia : Mekadonia a 'Nupa hlimna thuruk viagra' tih advertisement awm ve zia te hi :D

# Michael Rinsanga : Comedian Search laia zualko puan dup dup te hi

# Vala Sailo : Vawk vulh dan ziahna bu a Mumang hrilhfiahna lo tarlan vechhen...

# Lallungmuana Daisy : senior dept inkhawmpui a ''NU MAWHPHURHNA''sawi chiam te poh

# Michael Rinsanga:  ZoLife Magazine a sap chanchin ziah vak vak te chu

# Stephen Auhmun : Upa Pawl chanchinbu-a 'Ṭhalai Huang' dah hi a ṭullo ve angreng

# Michael Rinsanga:  Lengzem Magazine a 'Imanuela thizama'n tih lyrics dah tel pawh hi thil trul tak a nilo

# Stephen Auhmun:  Mitthi vuinaa mitthi chanchin ziahna a 'Horoscope' han dah tel kher

# Eric Zo Renthlei : Beramno a sawrkar hmalakna tarlan hi a tul lem lo

# Abie J Notlia FTH a 'Vaihna vartian' lo release ve chhen hi a tullo khawp mai

# Abie J Notlia :  Inneih sawmna Card a 'Iodine chih chau ei thin ang che' tih lo tel ve zia hi atullo

# Michael Rinsanga : Hriselna Huang a..... 'RX YAMAHA la thar tha tak ka hralh phal..' lo ti ve chhen hi..

# Michael Rinsanga :  Thihsak pawh ka ngam tih avanga han hmelchhiat tel kher........

# Stephen Auhmun :  Inneih Bulletin a 'Zualko' han tarlan

# Abie J Notlia : YMA Information Centre atanga Pakistan Bomb puah thu han puan ve zia hi atullo nasa

# Michael Rinsanga : Mipuiin fiamthu thiam a kan ngaih tak avanga han thau vak2 kher.. Eg- Uang Huang, Nuihtheih thil, Zephyr

# Michael Rinsanga : Family Album a Back Streets Boys leh Taylor Swift thlalak tar tel kher hi chuh.........

Meihawl Graffiti

Meihawl graffiti

-       

Thingtlângah te, khawlian ve angreng deuvah te, khawlian nia inhria – an khaw ṭhenawm ten khaw lian nia an ngaih vak silovah te ka zin ve nual ta. Heng khaw hrang hrang kan zin kual châng hian daihnai chawlhbûk velah kan chawl ve zeuh zeuh. Khatia chawlhbûk ni ve lêm si, chàwl an awm leh silo kha kan lainat a, kan chàwl ṭhin a ni, ti ta ila, a ṭawngtheihthlâk kan ti hlawm ang. Chu chu kan chawlh chhan a nih si loh avangin.

Zawhna : Enge kan chawlh ṭhin chhan chu ni ta?

Chhânna : Chhan tehchiam a awm lo. A remchâng a, kan châwl a ni deuh ber mai.

Chutia châwl ve ta chuan tuisik te pawh kan in a, kan hawi kual vel ṭhin bawk a, a rau thawh dàn azirin a awm velote kan rêl ṭhin bawk. Sawi tawh angin, kan hawi kual vel ṭhin a, chutia kan hawina lamah chuan chawlhbûk bangrel leh a bang velah te chuan meihawl graffiti kan hmu ṭhin.

A zawng a za; a kip a kawi; a mawi a nawi; a hauhûk leh chèpa kai leh zenge chu hre lo tùrah min lo ngai ta rih phawt ula (Ngai tih lêmah “Niminah ram riahnaah Liana’n Kungi a ngai” tiha ngai ang chi ni lo hian).

Meihawl Graffiti hrang hrang han thlir hian a tlangpuiin Romance a tam deuh ber a, chawlhbûk wall post hrang hrangah te hian nula-tlangvâl inngaihzawnna lam a tam. (Lam a tam – wordplay mawi lutuk!).

Khaw pakhat daia an chawlhbûkah chuan Teremi a lâr hle mai. A hmelṭha viau a nih kan ring. Kan chawlh laiin an khaw pa pakhat rawtuai khawrh a rawn châwl ve a, rawnâl - nau hmai tiat tiat a rawn ak ṭûn. Teremi pahnih an awm thu min hrilh. “Hmanni lawka pasal nei ta kha a ni ang, heta inziak hi chu” a tia. A pasal neih hnuah chawlhbûk wall post an lo la remove lo hlauhva, kan knowledge a zauh phah sawt. (Hetianga chawlhbûka meihawla thu inziak chhiar hi knowledge a tling rêng em, tih phei zawng scientific proof a awm hlei law).

Teremi zûna uai chu an tam viau nge ni a, mi pakhat – Teremi âtchilh deuhtu a awm tih chu kan tan finfiah hleihtheih a ni law. A hming a lan tam vâng erawh chuan kha chawlhbûk bikah na na na (Talk about you and me… ) kha chuan celeb a ni.

Tichuan Teremi chuan he thuziak hi a lo la chhiar ve te a nih ngai chuan a lo inhre ve ngeiin ka ring a. A induh phah sawt ang nge, a zak ang? Min ngaihsan phah deuh sawt dawn nge an chhungkuain (a pasala chhungte zawng zawng nena inthlanpawlhin) min ngeirawn dawn?  - I lo thlir ang.

Heng Meihawl Graffiti ah te hian lunglênna lam chi hrim hrim hmuh tûr a awm nual bawk a, hmun pakhatah chuan sa kah ni chhinchhiah a ni. Naupang chhiar atana ṭha lêm lo thuziakin hmun a chang tam angreng hle a, a ziaktu leh ama circle ami, mi tlêmte chauhvin an hriatthiam theih tur lamtawi-a thuziak a awm nual.

Hmun hrang hranga Meihawl Graffiti ka hriat theih chhun chhun ka’n share teh ang. A duh tan LIKE theih a ni.

1.    (Teremi aṭanga ṭanin) : Teremi ka va ngai tak em.

2.    Mupui kah ni : 11.12.11

3.    LMA ♥ RPI (Hetiang hi a tam fu)

4.    Kan la ngai dawn mange, khuareiah

5.    Thangluliana

6.    Ka di lenna ka thlir vawng vawng. VLTA. 18.4.01

7.    KKahLZTCH (A awmzia min zawt suh – ka hre bik lo)

8.    Pari dawr

9.    Runhmunah aw, Terem

10. Drogba

11. Ziak hnawk suh

12. Inrinni hian vawk kan ser dawn. A duh tur chuan min hrilh dawn nia. – Hualkunga, Mual Veng

13. RLA – kan hawsan ta mai che. ZTPA

14. No pain, no pain.

PHERH BER KHER

Beidawng lova min beisei hnuah
Mitmei hmu hauh si lo khan
Mi zinga insawitheih na'n min hmang vei maw!
....
"Ka ṭangnêm bel rawh" min tih lai khân
I ṭangnêm a khawng mah mah si a
Bra chhah chi-ah i ṭuan vei maw!
...
Anka nêm nen i nui her her
Zawlaidi nen min veh ther ther
Zaleng zawng ten min sêl ser ser
"A kawp vel e, PHERH BER KHER"