A bawplawk

Hman zan chu TV-ah chanchinthar ka en a, ka ngaithla pah bawk a, Central Minister pakhat Mizorama a rawn zin thu a ni nghe nghe. “Minister zahawm tak Pu Englova chuan lehlângin Mizoram a rawn tlawh dawn a, tlaiah a haw leh ang” a ti, a puangtu’n. Hetia ‘Minister zahawm tak’ an awm hran a nih chuan ‘Minister zahawmlo tak’ pawh an awm a nih hmêl! Lehlânga zin te chu tlaia a haw leh loh ten lehlâng a ni nâng!

            A hnu lawkah vairam hmun pakhata mipui leh police te intualvuak thu a rawn puang a, hliam tuarte chu damdawi in hnai ber panpui an nih thu a sawi. Ka ṭhuthmunah ka lo ngaihtuah ve neuh neuh a, damdawi in hnai ber an panpui loh nâkah! A hla ber panpui thu awm hek lo! Mi hliam tuar, a ranglama bawihsawm ngaia an awm laia “Chumi khami damdawi inah kalpui ang. Ka hmelhriat nurse a thawk ve alawm” tih chi a ni dawn emni?

            Chutah TV hnuai scroll, ‘thu bawkvâk kal zet zet’ ah hian fakna a rawn lang a, ‘TV neilote tana dawr pakhatin installment-a an pek theih’ thu. TV neilo na na na, engtinnnge kha fakna kha an hmuh ang ni? “Mobile phone ka nei thar ve a, ka number hre duh chuan min rawn call rawh u” tih ang vel a ni.

            “Hriattirna puan tur kan neih kan han puang ange” an rawn ti puam leh ṭalh ṭalh a, “Aw! In neihloh te chu puan thu a awm hleinem” ka ti rilru a, khawiahmah phei chuan sawichhuah ka tum chuang lo. “Hello, hello! Chumi khami vêng information centre aṭangin. Tukkin zing hian puan tur engmah a awm loh avangin engmah kan rawn puang lovang” tia vantlang aurinna hmanga thu puan ang deuh a ni.

            ‘A mamawh apiangte’ hman tura thisen pek thu pawh ka hre ṭhin. Ni e, a mamawhlo te tana pek ṭâlh thu a awm lêmlo. A mak dawn êm asin – “Nimin khan YMA Branch pakhat chuan a mamawhlo apiangte hman turin thisen Rambo polythene riat an pe!” A châng phei chuan ‘damlo mamawh te tana hman tur thisen pek’ thu pawh! ‘Damlo mamawhtu’ chu medical college te hi an ni deuh ber lawm ni – experiment tih na’n! Psychiatry Department lamte hian min mamawh ngawih ngawih mai ang tihte hi ania ka hlauh ni.

            Fakna hmuhnawm tih deuh deuh ka nei. Vodafone ho ZooZoo fakna ho te hi a ṭha thei ka ti. A sapṭawng takin rhyme leh flow ṭha zet zet leh catchy tak tak a awm ṭhin. ‘Kan North East Kan Star’ ang deuh hian ti ve dawn ta ila, ‘Kan Hnahlan kan Zawlaidi’; ‘Ram pum-ah Rum Pum’ – a va ṭha e!

            Fakna titu ṭhenkhat chuan anmahni dawrtute chu an ina an dahsak theih thu an sawi a, a lawmawm ngawt mai. Amaherawhchu, septic tank paihfai ṭhin an nih chuan ka inah min rawn dahsak lo mahse pawi ka ti lo angreng.

Motor-a tui chawi ṭhin te hian inah min dahsak thei lo ta se a buaithlak hlein ka ring bawk. Veng inhlat deuh nih phei chuan an ina mi kan va chawi ṭâng ṭâng dawn tihna ania!

Chanchinbute hi inah min rawn dahsak lo ta se a buaithlak hle bawkin ka ring. An office-ah kan va kal anga, an computer-a an dah kha kan va inchhiar chhâwk emaw a ni’anga.

            Fakna ṭhenkhat hi chu ha hawlh tak tak a awm vein ka hria. Khawvel huap courier service titu lar tak pakhat pawhin khawvel khawi hmunah pawh bungrua an thawn theih thu an tlangaupui ṭhin. Mahse, New York aṭangin Rastali-ah commode brush pakhat thawn duh ta ila chhuanlam mawihnai tak nena min hnial thlâk ka ring tlat.

            ‘Be a man, just like a man’ fakna pawh hi ngunthlûk taka ngaihtuah hian ka ngaihtuahna a tibuai. 'Be a man' tih hi chu chiang sa rân mai. 'Just Like A Man' tih lai tak hi mipa tling zat lo te sawina a nih duh hmel riauva ka hriat.

            “Kan puanven leh ballboot sawi chhîngin malaria i do ang u” tia sawmna kan dawng fo mai pawh hian min tibuai ṭhin. Puanven chu kan sawi chhing chhên thei e; ‘Ballboot sâwi chhîn’ hi chu a harsa a nih rih hi. Ka thiam thei ngang lo. “Kan thle lek lek kan thlunglu leh kheimit” tih ang deuh ni maia ka hriat.

            India ram huap English News channel te pawh hi ka thlir ve zeuh zeuh ahin a, bahlah an ngah ve tho ṭhin nia. Ṭum khat pawh politician hlun tak pakhat a boral ṭumin news chhiartu leh mitthi in-a an reporter kha live-in an inbia a, news chhiartu chuan “What’s the mood out there?” zuk han ti a! Mitthi inah te eng ‘mood’ nge awm se a tih rêng rêng ni? Reporter khan “Oh, in fact, the mood is very jubilant here…chuti khati” a ti lo hlauhvin ka hria. Lo chîk ve mah teh u; an reporter te hian “In fact” tih hi an sawi zing hlawm tak tak – a bikin live report-ah.

            Hindi ṭawngah chuan mi hming tawpah zahna entirnan ‘ji’ an telh ṭhin a nih hi. Sonia-ji, Laloo-ji, Lalthanhawla-ji etc. Ṭum khat pawh reporter pakhatin Railways Minister a nih laiin Mamata Banerji a interview a, ‘Banerji-ji’ a tih a ṭul ta ṭhin si a, a rik dan chu a nuihzatthlak vei reuh phian. Han ti ve chhin mah teh u. In ṭhenawma Pu Ralzi-a kha Hindi-in han kawm ula, ‘Ralzi-ji’ in ti in ti mai ang.