My Flickr Page

My Flickr Page

Ka Sapțawng Zirna JF-a Love Letter

Mi tam zawk chuan sapțawng zir na’n Dictionary te an hmang a, țhenkhat lahin a bika siam sapțawng zirna sikul te an pan a, kei ve hi chuan love letter ka’n hmang khauh mai pekah!

Lehkha chhiar thatchhe tak ni si hian midangin min ngaihdan turah chuan “Hepa hi chu a inchhiar zauvin a fing ngawt mai; a va ngaihsanawm tak em ve aw” tih hi nise ka duh tlat lawi. Chutiang tur chuan lemchan pawh ka taima angreng. Thu leh hla lama tui tak tak hawt si lo hian a tuite zinga intahluh țalhte hi ka ching a, tui niawm taka internet khawvela thu han thehdarhte, magazine-a thu ziahve te pawh ka ching – sum leh paiah ka ziaawm phah hranpa lo na a.

Chutiang mi, lehkhabu chhiar thatchhe em em mai hnenah chuan ‘J.F.-a Love Letter’ tih bu hi a rawn thleng ve teh nawlh mai. He lehkhabu erawh hi chuan min den dân a dang ta zar mai. A țul miau avanga peih lo chung chunga zirlaibu kan bye-heart țhin bak kha chu dân naranin eng lehkhabu mah hi ka chhiar nawn tak awn awn ka hre lova, ka peihlohna hian a tlin êm êm a ni.

He Love Letter bu erawh hi chuan ka hnen a rawn thlen ațangin ka lukham hnuai a chang nghal chat mai a, tunhmaa thingtlang lama supply thiar țhin Jeep țâwng an sawi ang leh nau tihmawh zunin an sawi angte, dawhtheihna tlachham pa thinchhe zu bilh an sawi ang maiin, ka hawngin ka keu sek ta mai. Engahnge sâpțawng a thiam viau vei!

Pu JF Laldailova khan sâpțawng leh Mizo Țawng a thiam tih chu inhnial tehchiam ngai lova hriatsa a ni a, “An sawi ang a lo nih loh tawp hi a! A lo thiam hle; êm êm; takzet a nih zâwk hi” tih hi a Love Letter ka chhiar ațang khân keimahah a chiang tawk a, inzirnan ber ka hman phah ta.

Tak tak a ni em, ka hre lova, ka rinthu mai mai phei chu a ni. ‘A ni e; a ni love’ ti turin research beih hleihtheih a ni hauh lo. ‘Marawhchu, kan Pu JF-a khân sâpțawnga duhtâwka thu ziah kha a châk țhinin ka ring a, chutianga han tihna tur remchang kha a awm lêm loh avang khan a love letter-ah hian a châk zualpui a inhrithla țhin a nih ka ring. Kan fiamthu thiam Ngaihsaka țawngkam han trick lawk ila, ‘A turu-buru’ lulai em țhin mai.

Amah hian a lehkhathawna a sawi dan chuan Ethel Zari’n Sapțawng a lo pawl nel zual theih nana educate pah zel a tum vanga a lehkhathawn bikah hian Sapțawng chelek tam niin a insawi. A enga pawh chu lo ni tehreng se, hetiang lehkhathawn ngaihnawm leh turu lo vawnțhat khiau nachang hria, a dawngtu hi ka ngaisang hrim hrim bawk.

Literature leh grammar tuipui ve tehchiam lo mah ila, a hminga rêl chuang tawh ni ve manah he kan Love Letter bu-a kan pu-a sapțawng hi ka phâk ang tawk tawkin ka bel chiang ve viau mai. Mizopa rilru leh ngaihtuahna nena ka hmehbel vang emawni, an Shakespeare-a sawi ve chhên te ai hian keimah-ah kher kher hi chuan a tla na zawk daih nia.

Nia, kan țhianpa Shakespeare te hi chu an țawngkam a hmânlai tawh a, ‘tunah te hian la dam se chu a upa tawh viau ang’ tia kan nau Hruaia’n a sawi țhin ang deuhvin an hunlai sapțawng kha tun hnua mi te hian kan hmanpui tam lo êm bawk atin ni. A sâppui, tunlai mi David Beckham-a te pawhin “Ye shalt have tribulation, Scholes. To thee shalt I pass doth ball” an tih kan hriat ngai bik loh tawp hi. BBC News pawhin “President Obama proclaimed unto his people, Behold, the people of America” an tih ngai chuan loh hi maw

Sapțawng thumal chi hrang hrang duhtawka a han bawlzân kual vel han hmuh hi chuan mahni kan insit thei titih nia. ‘I feel satisfied that I am dating you from afar. No need, therefore, of a chronological dating or formality’ tih nachang te hi a’n hre bik thlip thlepah! E khai, hetia entirna atana ti niawm fahrana kan duh lai lai kan thurchhuak dawn a nih chuan thurchhuah tur bik tak tak a awm chuang silo.

Pu Editor, ka thuziah hi dah tel lo law law ila, a aiah a Love Letter bu pumpui kha i lo dah zawk mai dawn emawnile. (Kut hah man erawh paih tel chuang si lo ang chi khan). ‘Blessed are the Mizo Community of Churrachand who are so privileged to view your angelic countenance every day if only they chose to do so, and woe unto us outsiders who are constantly denied the freedom of such a spectacle dispensed gratis by providence’ tih ang hawizawng hian miin thu min han thawn ve ngat se chu friend request ka thawn nghal loh atakah! Hmelchhe-thawuih-dulkiartarmit-țhing deuh-vuah engang pawh nise.

Keini sapțawng chelek ve khanglang hi chuan prostitute tih te hi a awmzia pakhat bak kan hre lova, kan Love Letter ziaktupa erawh hi chuan a tawk cial lehpek hle. A chipchiar erawh chuan ka sawi dawn lova, a hre duh tak tak chuan a Love Letter bu hi lei tur/hawh bo tur zawng ula, dictionary nena inchhawpin a bu chhung hi lo google ve mai tur a ni e. ‘Dictionary inchhawp tur’ tih lai hi a pawimawh et et teh ania aw.

Pu LF-a Love Letter bu-a a thu phuah mawi tak takte hi SMS-a thawnah ka hmang fova, keima ir leh âwm – ka irâwm chhuak niawm taka lantir ka ching lehnghal. Ka thawna te lah he lehkhabu la chhiar ve hauhlo tur tih ka hriatchiante an ni hlawm nen, thiam min ti viau zel. Enge! Anni pawhin birthday card vela thu inziaksa min thawn ve țhin tho. Facebook lamah erawh chuan ka tarlang ngam chiah lo thung. Kan U Mafaa hian a lo hmu ngei dawn a, “I va zaktheilo ve! Nangma original pawh a nih chai loh kha. Nangni chhungkua hi thlahtute ațanga mi thu ruk ching in ni” min tih erh ka hlauh vangin. 

Nulat-tlangval kan hriat țantirh khan he lehkhabu hi lo hmelhriat tawh ni ila chu ka tâwnah Lêngi lu a hai ve nual maithei a. He lehkhabu hi lo hmelhriat hma deuh hlek ila chu kan nu nen pawh hian tun ai chuan kan inneih hma hret ka ring hial a ni. Keima own-word hlir khan letter, email leh SMS kha ka țhin si a, a țang rei teh țâwng êm rêng asin!

He Love Letter hi Sapțawng zir nan’a ka hman ka ti teh hluai na a, ka thiam phah ta viau e, ka tihna a ni lem lo. Ka thiamthei vaklo a ni ang. Ka chhiar nasa hle a ni tih erawh ka sawilang duh a, in awihloh chuan ka nupui pawh in zawt thei ang. Sawi ngai sawi nawn sek mi ka nilova, sawi tawh angin he Love Letter bu-a thu inziak zawng zawngte hi heti maia han chip zawh sen a ni lo. Chhiar tawh tih pawh a awm thei meuh lo. A chhiar tawh chuan kan hria anga, Sapțawng hlang a ni lova, a bu chhung thu tam zawk hi Mizo Țawng mawi em em maia ziah a ni zawk. Mahse, kei chuan a Sapțawng lai bik hi ka rawn thlurbing a ni mai. Dem ngawt chi ka ni lo.

Triau Trackx "Ka lo nghak reng ang che" Vai țawng pai version: (Originally posted on Facebook Feb 25, 2014)

Nangma lungawi mi, Nangma hlim mi?
Koima zawhna sawi thei a ngai
Nangma kha lungngai soi, beidawng soi
Koima zawhna san tur a ngai..
...
Tlan dawn mi, bo daih dawn sawi mi?
Koima zawt nih hi, i hriat tur a ngai
Engpawh thleng tur ni kha
Hemi hriat reng tur a ngai
...
Lungngai awm ang, beidawng pawh awm ang
Hetiangin nangmah khuh vek nih kha
Khawnge kal dawn nangmah sawi harsa maw
Nangmah keiman nghak dawn lawm, inah lo kal mai rawh se

KA LO NGHAK RENG ANG CHE (hip Hop version)

KA LO NGHAK RENG ANG CHE (hip Hop version)
...
Chillin ain't cha, life's cool ain't it?
Shotz'a comin, bangin back bro?
Innit you broke, fella; innit you a downá hella
Them shotz I ask, u better bang back bro..
...
Runnin awry, trippin scary
Them shotz I ask, yo, hear me holler
Them stuff's a comin, them sh**'s a wadin..
Ye gotta git this bro, sure ye gotta git this...
...
Storm cumz a brewin, hope's kinda fadin
Rottin sorrow gotcha wailin
Innit you blind, wander and roam
Hommies a waitin, ye better be comin home...

Nupui-pasal then hla

Phuarna hruihrual phelh dulin
Suihna lazai zai chatin
Thlunna lakam valh phelhin
Zalenna hnawksak thlahlelin

Tawng kim generation

Thuhma : He thutawi hi Lunglen Magazine, May 2013 ah chhuah a ni tawh.

1970s-1980s hun chawhma lama piang Mizoram naupang ho khan hun inthlak danglam, a tunlai ṭawng takin ‘Change’ kan hmu hnem bik ngawtin ka hria.

Khawvelah hun inthlak leh inher danglam lian tham tak tak a awm. A khawmualpui leh ram azirin chu’ng hun chu a inanglo thei ang. Europe-a Renaissance leh Industrial Revolution te, Indopui avanga hun inher danglamte, anmahni awptute lak aṭanga zalenna an hmuh avanga ram leh khawtlang nun insiksawite – a tam mai. 

Keini Mizote zingah pawh hun inher danglam pawimawh tak tak a awm nual. A ṭhente chu khawvel virkualina min virpui ve tho avanga kan tawnte a nih laiin a ṭhen erawh chu khawvel hmun dang ami tena min hriatpui tehchiam loh – keimahni ta bil liau liau te pawh an ni ve bawk.

Chu’ng hun hrang hrang tawngtu te zingah chuan 1970 – 1980s chhuak ho hi a tawng kim pawl tak leh tawng pawimawh pawl tak kan ni mai angem aw ka ti deuh a ni. (Pâwl kan din tâk phei chu ka hre hlei lova! Nge ni a, pawl chu a ding daih tawh a, membership fee min khawn ve lo zawk?)

Mizoram politics chanchina pawimawh berte zinga mi ‘Rambuai’ zualpui kha kan hre hman hlawm lo na a, a rual u deuh kha chuan a boruak an tem ve nual hman. Kei takngial pawhin curfew kha chu ka hre ve.

Keini rual ho zingah hian CRP Camp-a atta la dil miahlo kan tam lo maithei e. Kan ûte ho ‘Tea Stall’-a an inhnangfak lai hnukchhuaka, ‘Fast food restaurant’-a hruailuttu te kan ni a, ‘Fried Rice artui chhipchhuan’ hmuchhuaktu kan ni.

Lieutenant Governor leh Governor danglamna hre turin UT sawrkar leh State sawrkar kan hrawn hman ve ve a, Assam Rifle hmuna ‘Laipui kawh hlauhawmzia’ inhrilhchhâwng ṭhinte kha kan ni.

Durtlang khâma ballot box lumte leh EVM kan thliar thiam thlap a, ZORO ‘Aih ka laih saih’ kan hriat bel tluk zetin MNF – MNF(N) – ZNP pawh kan bel ve thawkhat hman.

Keini rual ho kha raw bul chang tiangkawm leh a thei deuh fa tena sawrkar tiangkawm nena hockey khel ṭhin ve tho kha kan ni a, kan ûte ho ruala Gabriela Sabatini lo ralkhat ‘tawihtu’ leh kan naute ho kianga Anna Ivanovic lo ‘Like-tu’ kan ni ve tho tlat.

Kan naupan lai khan (‘Ti ve khanglang ila’ ka ti dawn lova; kan naupan lai a ni miauva), khawpui leh thingtlang kha tun ang em em hian a la inthlau lo niin ka hria. Khawpui naupang leh thingtlang naupang khan – tuihâwk kan khuap a, lui kan kal a, sairawkherh nen sava kan veh a, thangchep kan kam a, Masi ruai ṭhehna tur hnah kan la a, pawl bûk kan sa a, kan in-bai-lem-chhuan ṭhin (Chi ka thawh ve fo). Dan naranin khawpui leh thingtlang naupang khan ‘Chatuan Sweet’ kan ngaina deuh fur a, Thangkura leh Hamlet kan ngaithla ṭhin bawk. 

Khawpui emaw thingtlang emaw, keini rual ho kha tuikhura tui chawi ṭhin, public point ami khai ṭhin, mahni ina tui connection lakna tura PWD lamlian laichat tawh kan ni fur awm e. TV antenna leh booster herh tawh ṭhin; cable TV signal drop a taka tawngtu kha kan ni hman tlat. 

Thimhlimah kan pawnto deuh ziah a, kan sikul-a lut ve hmeichhe naupang ho zingah lah khan inkawibah thiamlo ka hre mang hauhlo. Thingtlang naupang ai chuan khawpui naupang khan motor-a behna tur kan hmu zing deuh bik thung.

Hengte hi kan ûte ho paw’n an ti ve vek a, kan naute ho erawh chuan hriatloh an nei nual ang. 

Cinema Hall kan bel hle a, Zodin blacker pakhat phei chu a hmel ka la mitthla thei. TV rawn lut kan en a, kan hmuhlai ngeiin a ni, kan ûte, kan pa te’n an herh rik ṭawk ṭawk ṭhin ni. 

Ṭhianzahoin thawhkhawma ‘Vedio’ cassette hawh ṭhintute kan ni ve a, ‘Ka nu, khawnge i awm?’ tihte, ‘Heroin zuar chu an thi tur a ni’ tih Mizo filmte pawh kan ṭahpui ve hliam hliam hnuah Korean film kan kurpui ve leh tho bawk a.

Hengte hi kan ûte ho paw’n an ti ve vek a, kan naute ho erawh chuan hriatloh an nei nual ang. 

Laldenga Cup, Nipenga leh K.Lala buaipui ṭhinte kha English Premier League leh UEFA Champions League atchilhtu kan ni leh a, Zodi leh Vulmawi aṭanga Tornado, Terminal leh Tribal Power; ‘Khawpui Lammuala Zorock concert’ leh ‘Zika Music Video’ tleipuitute kan ni ve leh zel tho mai.

Chanmari kawn aṭanga Tlangnuama St. Paul’s High School-a ke-a kal ṭhinte khan Town Bus-ah, ‘A haih – haih’, ‘Asangi’, ‘Bezalel’ tih angreng inziakah kan pakai a, City Bus te, Bazar Bus te, Sumo ten kan vanglaiin min nangching hman. Khaw ṭhenkhata autorickshaw khalh hmasa pawl pawh kan rualpui tho.

Kan ute ho chuan ‘P.U.’ aṭangin college an rap a, kan rualpui ho zingah erawh chuan ‘P.U.’ zir hman leh ‘Higher Secondary School’ rap hman kan inkalthelh nuai mai. Comprehensive School-a kai hman pawh kan awm nual ang a, NEHU- Aizawl Campus leh MZU dai pawlh nawk nawktute kha kan ni.

Chhimtuipui District kan hriat bel hle hnuah Saiha District-in min tibahlah chuang lova, Tuirial Airfield leh Lengpui Airport aṭanga zin tawhte kan ni ve tho.

Sawi tur a tam na a, he kan Lunglen chanchinbu ‘Letter to editor’ ah erawh chuan ‘Justin Bieber poster plsss; Adele chanchin plizzz….’ tih bak a awm leh chuang si lovang… Nghe Nghe Nghe…

(Kolasib, April 2013)

K'u Chuauhnuna tan

Tlangval fel tawh tak, fel mah mah tawh, sorkarah pawha Deputy Director hial a nih hnua March 8, 2013-a nupui nei ve tur, amah K'u Chuauhnuna pualin ....
....

Khuanu zarah kan dam anga kan la thi ve chek ang! Chumi hun a lo thlen chuan ka ruang an lumen zanah kan ṭhenawmte bathlarah Hmingsanga te, Darrokima te, Mamuana te, Chuauhnuna te an ṭhukhawm anga, fiamthu an thawh ang a, zahmawh te pawh an sawiin ka ring. Chutiang mi, ka ruang pawh zahpah lo leh ka chhungte mitmei pawh ven tum hauhlo tur tih ka hriatchiansa te nupui-pasal neihni (Ni e. Nupui-PASAL neihni) ah chuan engvanginnge ka kal ang?

Hun ṭha a la rawn inher chhuak zel anga, nupa te pawh an la inchaltauh ve bap bap ṭhin ang chu. Chu’ng hun a lo thlenah chuan an ṭhenawmte bathlar aṭangin Hmingsanga te, Darrokima te, Mamuana te nen kan ralthlir anga, a ṭul a nih chuan zahmawh te pawh kan sawi ve a ni ang chu.

‘Chuauhnuna’n nupui neih a tum’ tih ka hriat khan engtin mah ka awm vak paw’n ka hre lo. Telephone-in ama’n min rawn hrilh a, ‘E! E! A nih tak chu a. Khawia mi? Engtikah? E! E’ tih ringawtin ka chhangin ka hria. Ka awphawi aṭang khan ka be ning deuh tih kha a hrethiam em ka hre lova. Kan inbiak zawha phone ka hmeh hlum rual khan angry birds game ka khelh chhunzawm leh nghal a ni.

Senior Grade MCS officer ni tur hian a lo berah Junior Grade-ah kum 5 aia tlem lo awm phawt a ngai. Tlangval tan Senior Grade MCS Officer a nih theih loh. Kan hriatthiam tlan theih dan turah chuan tuna mi, hemi Chuauhnuna hi Human Rights Activist chu nise ‘Ruatfela Nu Aunty’ vel a ni vah tawh ang. Arte pawh chhan nei lovin a thi lo. I lo thlir ang.

Aizawl Venglai-ah hian ‘Upa Pawl Youth Wing’ an siam em? Lo siam ta se, Upa Pawl chanchinbu-ahte ‘Ṭhalaite Huang’ dah ṭalh an tum angem? I lo thlir ang.

Nula rimna velah intihre fahrana ‘Khawvela puanṭhui rang ber chu Taylor Swift’ titu kha Chuauhnuna hi lo ni reng em? Nge ni a, Fake Account?

E. Lungdar-ah BDO a nih laiin ‘Nulate enthlak, tlangvalte entawn’ niin ama’n a insawi. An entawna ber khan a zir lo nge kan hre lova, pass an awm mang lo.

Kolasib-ah ADC a nih zawk chhungin ADC ve tho Pu Khamluaia kha a thawk-a-phitah ‘Please come, Pu Kham’ tih a ching a, beng a ti kham ṭhin hle.

Ngopa-ah SDO (C) a nih lai leh Manipur-a Naga pawl hrang hrangtena kawngpui an danchah avanga Ngopa lama supply an thiarluh hun kha a innang hlauh. Meitei truck driver 10 chuang a hmelhriat hman a, ‘Imphal-ah chuan ka tlang ve viau asin’ tiin a insawitheih phah viau tih hriat a ni.

Thingsulthliah BDO a ‘zuk’ ni leh a, mi ṭhenkhat anga ‘DBO – Development Blocking Officer’ tia sawi chi a ni ve lo. A bialchhunga ni 100 inhlawhna Job Card-a nula thlalak inbelte kha a taka an hmel a hmuhin an Job Card number-in a ko chat chat thei.

An inneihni chu- kal ve duh viau mah ila. Ka kal lo zawk mai teh ang. Lu meh laklawh lai ka nei tlat.